რამდენიმე დღის წინ 2020 წელს დაგეგმილ კინოპრემიერებს შორის ერთ-ერთი ყველაზე მაღალი მოლოდინების მქონე ფილმის — დიუნის პირველი ტრეილერი გამოქვეყნდა, რომელშიც გაერთიანებულმა კადრებმა და ამის ფონად გაშვებულმა საუნდტრეკმა მაყურებლებისგან დიდი მოწონება დაიმსახურა.

სამწუთიანი ტრეილერის საუნდტრეკი ლეგენდარული როკბენდის Pink Floyd ცნობილი სიმღერის Eclipse ქავერია, რომელზეც თანამედროვეობის ერთ-ერთმა ყველაზე გავლენიანმა გერმანელმა კომპოზიტორმა ჰანს ციმერმა იმუშავა.

ამ ოსკაროსანმა ხელოვანმა დიუნისთვის მუსიკა მთლიანად თავად შექმნა, ამავდროულად კი იმ იშვიათ კომპოზიტორებს შორის მოხვდა, ვინც ტრეილერის მუსიკაზეც კი იმუშავა. ჰანს ციმერმა კარანტინის დიდი ნაწილი სწორედ ამ ფილმისთვის მუსიკის შექმნას მიუძღვნა, ამასთანავე კი დისტანციურად იმუშავა ლოს-ანჯელესის 32-წევრიან მომღერალთა გუნდთან, რათა Eclipse-ის ქავერი ჩაეწერათ.

ციმერი მომღერალთა გუნდს თავისი სახლიდან FaceTime-ის საშუალებით ერთვებოდა, თავად გუნდი კი შესაფერის დარბაზში გადიოდა რეპეტიციას, სადაც 12 მათგანი ვოკალისტი იყო, 20 კი ინსტრუმენტებზე უკრავდა.

"უსაფრთხოების ყველა პროტოკოლს ვიცავდით. მთელი ამ პროცესის განმავლობაში ყველას პირბადე ეკეთა, თავისი მიკროფონი ჰქონდა და შესვენებებს შორის ყველაფერს დეზინფექცია უტარდებოდა", — აღნიშნა ამ გამოცდილებაზე საუბრისას მომღერალთა გუნდის წარმომადგენელმა, ლემან ბოდიკერმა.

ხავიერ ბარდემი ფილმში Dune.

ფოტო: Warner Bros.

ჰანს ციმერს აქამდე ისეთ რეჟისორებთან ერთად უთანამშრომლია, როგორებიც არიან რიდლი სკოტი, კრისტოფერ ნოლანი თუ გაი რიჩი და ინტერსტელარის, გლადიატორისა და ბნელი რაინდის ტრილოგიის მსგავსი ფილმებისთვის შეუქმნია მუსიკა. მას დიუნის რეჟისორთან, დენი ვილნევთან თანამშრომლობის გამოცდილებაც აქვს: სწორედ ის იყო კომპოზიტორი ფილმისა Blade Runner 2049.

როცა დიუნის ტრეილერი გამოქვეყნდა, ამ ფაქტს ეს ცნობილი გერმანელი ხელოვანი თავის ტვიტერის ანგარიშზე ასე შეხვდა: "ჩემი ბავშვობის ოცნება ახდა".

Pink Floyd-ის ცნობილი სიმღერა Eclipse ამ ბენდის 1973 წელს გამოშვებულ ალბომში Dark Side of the Moon შედის. აღსანიშნავია, რომ ტრეილერის გამოქვეყნების შემდეგ ამ ორიგინალი სიმღერის გაყიდვები 1 750%-ით გაიზარდა.

თავად ტრეილერმა 8 დღეში YouTube-ე 24 მილიონზე მეტი ნახვა დააგროვა.

ასევე იხილეთ: