დემოკრატიული ინიციატივა ინტერნეტგამოცემა სამხრეთის კარიბჭის მიერ გავრცელებულ ინფორმაციაზე წერს, რომ მსგავსი მოთხოვნა არღვევს კონსტიტუციის მე-19 მუხლით აღიარებულ რელიგიის თავისუფლებას და ამავდროულად დისკრიმინაციულია.

სამხრეთის კარიბჭის ინფორმაციით, მოხის საჯარო სკოლაში, სკოლის დირექტორმა მეთორმეტეკლასელს ჰიჯაბის მოხდა მოსთხოვა.

ზოგადი განათლების შესახებ საქართველოს კანონის მე-18 მუხლის თანახმად:

  1. მოსწავლეს, მშობელს და მასწავლებელს კანონით დადგენილი წესით აქვთ რწმენის, აღმსარებლობისა და სინდისისთავისუფლება, ნებისმიერი ან არც ერთი რწმენისა თუ მსოფლმხედველობის ნებაყოფლობით არჩევის და შეცვლის უფლება.
  2. დაუშვებელია, მოსწავლეს, მშობელს და მასწავლებელს დაეკისროთ ისეთი ვალდებულებების შესრულება, რომლებიც ძირეულად ეწინააღმდეგება მათ რწმენას, აღმსარებლობას ან სინდისს, თუ ეს არ ლახავს სხვათა უფლებებს, ან ხელს არ შეუშლის ეროვნული სასწავლო გეგმით გათვალისწინებული მიღწევის დონის დაძლევას.

"ზემოაღნიშნული ნორმა, ისევე, როგორც კონსტიტუცია, აღიარებს და იცავს მუსლიმი მოსწავლეების უფლებას, სასწავლო პროცესის დროსაც ატარონ მუსლიმი ქალების ტრადიციული თავსაბურავი, რაც ბევრი მათგანისთვის რწმენისა და აღმსარებლობის განუყოფელი ნაწილია".