რეგიონული გამოცემის, სამხრეთის კარიბჭის ინფორმაციით, მოხის საჯარო სკოლაში, სკოლის დირექტორმა მეთორმეტეკლასელს ჰიჯაბის მოხდა მოსთხოვა. მათივე ცნობით, მან ერთი სემესტრი ბათუმში, №27 საჯარო სკოლაში ისწავლა და ახლა მობილობით მოხის სკოლაში ბრუნდებოდა.

მოსწავლეები სამხრეთის კარიბჭესთან საუბრისას ჰყვებიან, რომ მას ყველა საბუთი წესრიგში ჰქონდა, მაგრამ მოხის საჯარო სკოლის დირექტორმა თანხმობა არ მისცა, იმ მოტივით, რომ თავსაბურავი ეფარა:

"დირექტორმა განუცხადა, თუ გინდა სკოლაში მიგიღო, თავსაფარი უნდა მოიძროო".

სამხრეთის კარიბჭე წერს, რომ მოგვიანებით დირექტორმა გოგონა სკოლაში მიიღო და ის საგაკვეთილო პროცესებსაც ესწრება:

"მისთვის სოლიდარობის გამოსახატავად, დღეს, მისი თანაკლასელი ყველა გოგონა სკოლაში თავსაბურავით მივიდა. ამ ფაქტს სკოლაში რაიმე დაპირისპირება არ გამოუწვევია და დღეს მოხის საჯარო სკოლაში გაკვეთილები ჩვეულებრივ რეჟიმში ჩატარდა".

სამცხე–ჯავახეთის მუფთი, მამუკა ვაშაყმაძე გამოცემასთან საუბრისას განათლების მისნიტრს ალექსანდრე ჯეჯელავს მიმართავს, დაინტერსდეს მომხდარით.