მოძალადეს ელექტრონული სამაჯური პირველად მარნეულში დაუმაგრდა. კაცმა ცოლს სცემა და სიცოცხლის მოსპობით დაემუქრა. ცოლის თანხმობის შემდეგ მოძალადეზე შემაკავებელი ორდერი გამოიცა და ელექტრონული ზედამხედველობა დაწესდა.

შსს-ს ინფორმაციით, საქმეზე გამოძიება საქართველოს სისხლის სამართლის კოდექსის 126-ე პრიმა მუხლის 1-ლი ნაწილითა და 11 პრიმა 151-ე მუხლის მე-2 ნაწილის "დ" ქვეპუნქტით დაიწყო, რაც ოჯახში ძალადობასა და სიცოცხლის მოსპობის მუქარას გულისხმობს.

1 სექტემბრიდან, ძალაში შევიდა საკანონმდებლო ცვლილება, რომელიც ითვალისწინებს შემაკავებელი ორდერის გამოცემასთან ერთად, მოძალადის მიმართ ელექტრონული ზედამხედველობის დაწესებას, თუ ძალადობის განმეორების რეალური საფრთხეა.

ელექტრონული სამაჯურის მეშვეობით მოძალადის ვირტუალურ მონიტორინგს შინაგან საქმეთა სამინისტროს საზოგადოებრივი უსაფრთხოების მართვის ცენტრი — 112 უზრუნველყოფს. მოძალადის მიერ დაკისრებული ვალდებულებების შესრულება სავალდებულოა, ხოლო მოძალადის მიერ ელექტრონული ზედამხედველობისთვის თავის არიდება ითვალისწინებს სისხლის სამართლის კოდექსით განსაზღვრულ პასუხისმგებლობას.