ფრაქცია ერთიანი ნაციონალური მოძრაობის თავმჯდომარის, რომან გოცირიძის განცხადებით, მიხეილ სააკაშვილმა ბოდიშით საზოგადოებას აჩვენა, რომ მას და ნაციონალურ მოძრაობას წარსულის გააზრება შეუძლია. გოცირიძემ ტელეკომპანია პალიტრანიუსის გადაცემა დღის ნიუსრუმში აღნიშნა, რომ ექსპრეზიდენტმა ბოდიში დამოუკიდებელი სასამართლო სისტემის ვერშექმნისთვის და ძალოვან სტრუქტურებში მომხდარი დანაშაულებებისთვისაც მოიხადა.

სააკაშვილზე საუბრისას გოცირიძე გამოეხმაურა იმ ფაქტსაც, რომ ექსპრეზიდენტის ბოდიშს “ნიანგის ცრემლებს” ადარებენ.

"იქნებ ნიანგი გულწრფელად ტირის, რატომ დაიჩაგრა ეს ნიანგი, რატომ გვგონია, რომ ნიანგს არ უჭირს? ეს არის შემაჯამებელი ბოდიში, რომელიც ნიშნავდა, რომ მეტი შემეძლო გამეკეთებინა, მაგრამ ვერ გავაკეთე, ბევრი კი გავაკეთე — სასწორზე რომ დაიდოს კარგი და შეცდომები, სიკეთე გადაძალავს შეცდომებს", — განაცხადა გოცირიძემ.

მმართველი გუნდის, ქართული ოცნების წევრებმა სააკაშვილის ბოლოდროინდელი განცხადებები ნიანგის ცრემლებს შეადარეს.

საქართველოს მესამე პრეზიდენტმა, მიხეილ სააკაშვილმა 27 აგვისტოს თავის ფეისბუქზე გაავრცელა, სადაც ის ქართველებს ჩამოსვლას ჰპირდება და ბოდიშს უხდის. ვიდეომიმართვა ქართულმა ოცნებამ საკუთარ ფეისბუქგვერდზე გააზიარა წარწერით "Miha hamodiii". ქართული ოცნების ირონიულ პოსტს ევროპული საქართველო გამოეხმაურა და დაწერა: "თუ ამ წრეზე ტრიალი მოგბეზრდა, გამოსავალი ევროპული კოალიციაა." გამოწვევას მალევე გირჩის ლიდერი, ზურა ჯაფარიძეც შეუერთდა წარწერით — "shesha ar ari".