კორონავირუსის პანდემიას კიდევ ერთი "მსხვერპლი" მოყვა — FX-ის სერიალი Atlanta.

FX-ის თავკაცმა ჯონ ლენდგრაფმა მანამდე თქვა, რომ Atlanta მესამე სეზონით 2021 წლის იანვარში უნდა დაბრუნებულიყო, მაგრამ პანდემიის გამო სერიალზე მუშაობა შეწყდა და მისი გამოსვლის თარიღი გადაიწევს. მართალია, მას ჯერ ზუსტი ახალი თარიღი არ დაუსახელებია, მაგრამ ლენდგრაფმა განაცხადა, რომ შოუზე მუშაობა 2021 წლის დასაწყისში განახლდება და ის იმავე წელს მოგვიანებით გამოვა.

Atlanta-ს მესამე და მეოთხე სეზონები ერთდროულად დაიწერა და მათი გადაღებაც ერთად იგეგმება. ლენდგრაფის თქმით, "დონალდ გლოვერმა და მისმა მამაცმა გუნდმა" სცენარის დასრულება ბოლო რამდენიმე თვეში მოახერხა. ერთ სეზონს დიდწილად ატლანტაში გადაიღებენ, როგორც მანამდე, თუმცა მეორის მოვლენები ევროპაში ვითარდება.

ფოტო: FX

ლენდგრაფის თქმით, მსახიობებისა და გადამღები ჯგუფის უსაფრთხოება "ნომერ პირველი პრიორიტეტია" და ეს გულისხმობს არა მხოლოდ ახალ წესებსა და პროცედურებს, როგორებიცაა ტესტირება, სოციალური დისტანცირება და ადამიანებს შორის კონტაქტის დადგენა, არამედ ასევე მათთვის ექიმებსა და ეპიდემიოლოგებთან ხელმისაწვდომობის უზრუნველყოფას.

ლენდგრაფმა Atlanta-ს მე-3 და მე-4 სეზონებს "სერიალის ცხოვრების ახალი თავის 1-ლი და მე-2 ნაწილები" უწოდა. მისი მეორე სეზონი 2018 წლის მაისში გამოვიდა. სერიალი დონალდ გლოვერის შექმნილია და მასში თვითონვე მონაწილეობს ბრაიან ტაირი ჰენრისთან, ზაზი ბიტცსა და ლაკით სტენფილდთან ერთად.

ატლანტა FX-ის მხოლოდ ერთ-ერთი სერიალია, რომელიც მუშაობის განახლებისთვის ემზადება. ასეთივე სერიალების სიაშია American Horror Story, American Crime Story და Pose, ხოლო Fargo-მ ახლახან მე-4 სეზონზე მუშაობა დაასრულა და მას 27 სექტემბერს ვიხილავთ.