კომპანია თბილისის მიკროავტობუსი მგზავრებს მიმართავს, არ იმგზავრონ ფეხზე მდგომებმა და სატრანსპორტო საშუალებით გადაადგილებისას აუცილებლად გამოიყენონ პირბადე. ამის შესახებ კომპანიამ სპეციალური განცხადება გაავრცელა.

მათი თქმით, ორივე შემთხვევაში კომპანია მძღოლს უტოვებს უფლებას, არ დაძრას მიკროავტობუსი და სთხოვოს ფეხზე მდგომ მგზავრს ან მომხმარებელს, რომელიც არ გამოიყენებს პირბადეს, დატოვოს სატრანსპორტო საშუალება.

"უსაფრთხოების წესების დაცვის თხოვნით მომხმარებელს, ასევე, მიმართავენ კომპანიაში დასაქმებული მძღოლები, რადგან ისინი, ვინც ვერ მოახერხებენ სატრანსპორტო საშუალებაში წესრიგის დაცვას მგზავრთა დაუმორჩილებლობის გამო, მოიხსნებიან ხაზიდან და ჩანაცვლდებიან სარეზერვო მძღოლებით", — ვკითხულობთ განცხადებაში.

კომპანიის ცნობით, დედაქალაქში მოძრავი ყველა სატრანსპორტო საშუალება ყოველდღიურად გადის დეზინფექციას, ხოლო მძღოლებს ინფექციური ცენტრის დახმარებით, უტარდებათ ტესტირებები კორონავირუსზე.

10 სექტემბრის მონაცემებით, საქართველოში კორონავირუსის 57 ახალი შემთხვევა გამოვლინდა, გამოჯანმრთელდა 9 პაციენტი.

ინფექციური საავადმყოფოს სამედიცინო დირექტორის, მარინა ეზუგბაიას თქმით, 57 ახალი შემთხვევიდან 5 დონასთან არის დაკავშირებული, 15 ბათუმთან, 18 დადასტურებულ შემთხვევათა კონტაქტებია, 4 აჭარაში მოგზაურობის ისტორიის მქონე პირია, 3 შემოტანილი შემთხვევაა, 5 სამედიცინო პერსონალია და რვა პაციენტზე წყაროს ეძებენ.

ჯამში, საქართველოში კორონავირუსის დადასტურებულ შემთხვევათა რაოდენობა 1 830-მდე გაიზარდა, ამათგან 1 334 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: