დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, თავად მოქალაქებმა უნდა მივცეთ შენიშვნები ერთმანეთს, თუკი დავინახავთ, რომ ვინმე ვირუსის გავრცელების შეკავებისთვის დაწესებულ წესებს დაარღვევს. ამის შესახებ მან საკოორდინაციო საბჭოს შეხვედრის შემდეგ გამართულ ბრიფინგზე ისაუბრა.

"მიჩვეული ვართ, რომ ვიღაცამ უნდა გვაკონტროლოს. ერთმანეთს უნდა მივცეთ შენიშვნები. როცა საზოგადოებრივ ტრანსპორტში ვიღაცას არ უკეთია ნიღაბი, კეთილი ვინებოთ და მივცეთ შენიშვნა ადამიანებს, ეს არის რეკომენდაცია", — განაცხადა გამყრელიძემ.