თბილისში ბარ Sky girls-ში მომხდარი ფიზიკური დაპირისპირების საქმის გამოძიების ფარგლებში შინაგან საქმეთა სამინისტრომ მეხუთე პირი, 1983 წელს დაბადებული ლ.ც. დააკავა.

უწყების ინფორმაციით, ბრალდებულმა, ბარის 4 სხვა თანამშრომელთან ერთად დაწესებულების სტუმრებს სიტყვიერი და ფიზიკური შეურაცხყოფა მიაყენა.

გამოძიება ორი ან მეტი პირის მიმართ ჯგუფურად ჩადენილ ჯანმრთელობის განზრახ დაზიანების ფაქტზე, საქართველოს სისხლის სამართლის კოდექსის 120-ე მუხლის მე-2 ნაწილის "გ" და "დ" ქვეპუნქტებით მიმდინარეობს. დანაშაული 2-დან 4 წლამდე ვადით თავისუფლების აღკვეთას ითვალისწინებს.

1 სექტემბერს სოციალურ ქსელში ივიკო ფრუიძემ დაწერა, რომ თბილისში, Skygirls bar-ში მოსთხოვეს გადაეხადა იმ შეკვეთის თანხა, რომელიც არ მიუცია, უარის შემდეგ კი დაცვის წევრებმა და თანამშრომლებმა სცემეს.