პარლამენტის ფრაქცია ქართული ოცნების წევრი, ნუკრი ქანთარია ექსპრეზიდენტ მიხეილ სააკაშვილს "გულმოდგინე ენერგიულ ტუსაღს" უწოდებს, რომელიც "არის ძალიან შრომისმოყვარე კაცი და ქუდებსა და ხელთათმანებს კერავს". მისივე თქმით, ეს განცხადება უკვე "კომედიურ ჟანრს სცილდება".

"უკვე რაღაც ფსიქიატრიულის განხრით მიდის და ჩემი დიდი სინანულით მინდა ვთქვა იმ ბინადართა მიმართ, ვინც ამ დაწესებულებაში არიან, მაგრამ იქ პრემიერებიც არიან მოგეხსენებათ, პრეზიდენტებიც, პროკურორებიც, მაკედონელებიც, ნაპოლეონებიც. ასე რომ, აი, ამ არეალში შეიძლება უკვე ამის განხილვა. მაგრამ, მგონია, რომ ეს აკვიატება მალე გაივლის და მე მომავალში სააკაშვილს ვხედავ გულმოდგინე ენერგიულ ტუსაღად, რომელიც არის ძალიან შრომისმოყვარე კაცი და რომელიც ქუდებსა და ხელთათმანებს კერავს", — განაცხადა ქანთარიამ მთავარ არხთან ინტერვიუში.

ნაციონალურმა მოძრაობამ და ძალა ერთობაშიამ ყოფილი პრეზიდენტი, მიხეილ სააკაშვილი პრემიერმინისტრობის კანდიდატად წარადგინეს. როგორც პარტიის თავმჯდომარემ, გრიგოლ ვაშაძემ თქვა, გადაწყვეტილება მათ ერთობლივად მიიღეს.

საქართველოს ექსპრეზიდენტმა, მიხეილ სააკაშვილმა 6 სექტემბერს თავის ფეისბუქზე დაწერა, რომ მისი დაბრუნების გეგმასთან დაკავშირებით მორიგ მიმართვას ხვალ გააკეთებს.

მან ბოლო ვიდეომიმართვა 27 აგვისტოს ფეისბუქზე გაავრცელა, სადაც ის ქართველებს ჩამოსვლას ჰპირდება და ბოდიშს უხდის. ვიდეომიმართვა ქართულმა ოცნებამ საკუთარ ფეისბუქგვერდზე გააზიარა წარწერით "Miha hamodiii". ქართული ოცნების ირონიულ პოსტს ევროპული საქართველო გამოეხმაურა და დაწერა: "თუ ამ წრეზე ტრიალი მოგბეზრდა, გამოსავალი ევროპული კოალიციაა." გამოწვევას მალევე გირჩის ლიდერი, ზურა ჯაფარიძეც შეუერთდა წარწერით — "shesha ar ari".