ღიად პრორუსული პარტიის, პატრიოტთა ალიანსის ერთ-ერთი ლიდერი და პარლამენტის დეპუტატი გიორგი ლომია "დევნილად" მიიჩნევს ხატს, რომელიც ოკუპირებულ აფხაზეთში "საჩუქრად" ჩაიტანეს, მაგრამ უკანვე დაუბრუნეს. ხატი ენგურის ე.წ. გამშვებ პუნქტზეა დატოვებული.

"რაც შეეხება იმას, რომ ხატი უკვე სამი დღეა გამყოფ ხაზზე იმყოფება, ერთადერთი, რაც შემიძლია გითხრათ, ეს არის ის, რომ თუ ხატი იქნება დაბრუნებული, ეს ხატი იქნება დევნილობაში და აუცილებლად ოდესმე დაბრუნდება ისევ ილორის მონასტერში", — განაცხადა გიორგი ლომიამ.

იგი, ასევე, ამტკიცებს, რომ ოკუპირებულ აფხაზეთში ვიზიტი არ ყოფილა ფარული, თუმცა სურდათ დარჩენილიყო გაუხმაურებელ ფაქტად. მისივე მტკიცებით, რელიგიური თემებით "პიარის გაკეთბა" არ მოსწონთ.

"ეს არ იყო ფარული ვიზიტი, უბრალოდ, ეს არ იყო პოლიტიკური მიზნით შესრულებული ვიზიტი. ეს იყო ჰუმანიტარული აქცია, ასე ვთქვათ, რელიგიური აქცია. ჩვენ გვსურდა, რომ ჩაგვეტანა ხატი ილორის მონასტერში, რაც გავაკეთეთ და ეს უნდა დარჩენილიყო გაუხმაურებელ ფაქტად.

ჩვენ ამაზე პიარს არ ვაპირებდით და ჩვენი ჩვევა არ არის, რომ რელიგიურ თემაზე პიარი ავაგოთ, მაგრამ მოხდა ისე, რომ გახმაურდა ეს ამბავი. გახმაურდა ძალიან ცუდად. ჩვენ არ ვაპირებდით ამაზე პიარის გაკეთებას, მაგრამ მოხდა ისე, რომ მტრებმა გაახმაურეს და ცუდად გააპიარეს ეს ამბავი", — თქვა გიორგი ლომიამ.

პატრიოტთა ალიანსი ოკუპირებულ რეგიონში ისე ჩავიდა, რომ ეს ინფორმაცია დამალა. აფხაზეთში ვიზიტის შესახებ ამბავი მთავარმა არხმა გაავრცელა, მოგვიანებით კი ე.წ. აფხაზი ვეტერანების ორგანიზაცია არუაასმა დაადასტურა, რომ ისინი დე ფაქტო პრეზიდენტის თანაშემწეს, ლაშა საყანიას შეხვდნენ. თავდაპირველად საყანიამ ინფორმაცია უარყო, შემდეგ დაადასტურა და დე ფაქტო ოპოზიციის პროტესტის გამო ე.წ. თანამდებობაც დატოვა.

ორგანიზაცია არუაასა და აფხაზეთის ე.წ მართლმადიდებელი ეკლესიის წარმომადგენლებმა ილორის ტაძრიდან პატრიოტთა ალიანსის ნაჩუქარი ხატი გაიტანეს და ენგურსი ხიდზე ე.წ. გამშვებ პუნქტთან მიიტანეს. როგორც აფსნიფაბლიკი წერს, ხატი ე.წ. მესაზღვრეებს გადასცეს. რაც შეეხება მის ტრანსპორტირებას, როგორც ისინი აცხადებენ, ეს საქართველოს მიერ კონტროლირებად ტერიტორიაზე უნდა გადაწყვიტონ.