ალბათ, ამ დროისთვის უკვე იცით, რომ თქვენი შინაური კატა დიდი სიამოვნებით შეგჭამთ, თუკი მოკვდებით.

კატები დიდი სიამოვნებით მიირთმევენ უკვე ათასგზის ნაჭამ კონსერვირებულ საკვებს, თუმცა ყველაზე საყვარელ და ფუმფულა ფისოებსაც კი არ გაუჭირდებათ პატრონის სხეულით დანაყრება, როგორც კი მას პულსი გაუჩერდება.

"კი, თქვენი შინაური ცხოველი შეგჭამთ, როცა მოკვდებით. და, სავარაუდოდ, ამას საჭიროზე უფრო ადრე იზამს", — თქვა BuzzFeed News-თან საუბრისას სასამართლო ანთროპოლოგმა კაროლინ რანდომ 2015 წელს ცხოველების მიერ საკუთარი პატრონების შეჭმის ამბავზე საუბრისას და მიანიშნა, რომ "ამ პატარა ახ*რებს" ასე ძალიან არც კი შიათ. "ისინი, როგორც წესი, კისრით, სახითა და ღია ადგილებით იწყებენ, შემდეგ კი, თუ დროულად ვერ აღმოაჩენენ, დანარჩენ სხეულსაც შეჭამენ", — დაამატა მან.

მან ერთი გამორჩეულად საზარელი ამბავი გაიხსენა, როცა 1994 წელს ერთი კაცი გარდაიცვალა და მისი ცხედარი რამდენიმე დღის შემდეგ იპოვეს. მისი თავი, კისერი და ხელის ნაწილი "ძვლამდე" იყო შეჭმული. კაცის მახლობლად მისი 10 კატა იწვა მკვდარი. პოლიციამ დაადგინა, რომ კაცი წამლების ზედოზირებით დაიღუპა, რის გამოც მისი ცხედრის შეჭმამ მისი კატებიც მოწამლა.

გვამების ფერმაზე — დაწესებულებაში, რომელშიც სასამართლო ექსპერტიზის მეცნიერები სხეულის დაშლას შეისწავლიან — მკვლევრები, რომლებიც ადამიანის ცხედრებზე ლეშისმჭამელურ აქტივობებს აკვირდებოდნენ, გადააწყდნენ ველურ კატებს, რომლებიც სწორედ რომ ამ საქმით იყვნენ დაკავებულები. მკვლევრებმა ისინი შეისწავლეს და კვლევა Journal of Forensic Science-ში გამოაქვეყნეს.

ვიდეო: სიკვდილის მეცნიერება — რა მოსდის თქვენს სხეულს სიკვდილის შემდეგ

კოლორადოს სასამართლო გამოძიების კვლევის სადგურზე ადამიანთა ცხედრებს ღია სივრცეში ათავსებენ, მათ აკვირდებიან, ფოტოებს უღებენ და მონაცემებს ინიშნავენ. ამ დაწესებულებაში ლეშისმჭამელურ აქტივობებს კამერებით აკვირდებოდნენ და შეამჩნიეს, რომ გვამების ფერმაში ორი კატა შეიპარა და რამდენიმე კვირის განმავლობაში ადამიანთა ცხედრებს ჭამდა.

პირველმა კატამ 79 წლის ქალის ცხედრის შეჭმა დაიწყო და ის ძირითადად რბილ ქსოვილსა და ცხიმოვან შრეებზე ფოკუსირდებოდა. შემდეგ ცხედარი სხვა კვლევითი პროექტისთვის დამცავი გალიის ქვეშ მოათავსეს ერთი კვირით, რომლის განმავლობაშიც კატას მასზე წვდომა არ ჰქონდა. როცა გვამს გალია მოხსნეს, იგივე კატა 35 დღის განმავლობაში თითქმის ყოველღამით ბრუნდებოდა მის შესაჭმელად. ის ისევ რბილ ქსოვილზე ფოკუსირდებოდა — მისი მკერდის არეალი ამოჭამა და მარცხენა მკლავი ძვლამდე გამოღრღნა.

მეორე კატამ თავისი ყურადღება 70 წლის კაცს მიაპყრო და 16 ღამიდან 10-ის განმავლობაში დაბრუნდა მასთან, შემდეგ კი ერთი თვით მიატოვა, სანამ ისევ ზედიზედ ორი ღამით არ დაბრუნდა მისი ცხედრის შესაჭმელად.

"ორივე შემთხვევაში ველურმა კატებმა ის უბნები აირჩიეს, რომლებშიც კანი უკვე გარღვეული იყო. მათ დაშლის ადრეულ სტადიაზე მყოფი ცხედრები შეარჩიეს", — დაწერეს მკვლევრებმა.