თამარ ბაჩალიაშვილის საქმის პროკურორის განცხადებით, არც ავტომანქანაზე და არც იქედან ამოღებულ ნივთებზე ბაჩალიაშვილის გარდა, არც ერთი უცხო პირის დნმ არ აღმოჩნდა. ამის შესახებ პროკურორმა განცხადება დღეს, 4 სექტემბერს, გამართულ ბრიფინგზე გააკეთა.

"ექსპერტიზით დადგინდა, რომ სხვა, უცხო პირის გენეტიკური პროფილი, დნმ-ის შემცველი რამე ინფორმაცია ავტომანქანიდან ამოღებულ საგნებზე არ ფიქსირდება. ეს არის დასკვნით დადასტურებული. არც ავტომანქანაში, არც ამოღებულ ნივთებზე", — განაცხადა პროკურორმა.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.