საქართველოს პირველი პრეზიდენტის, ზვიად გამსახურდიას შვილის, ცოტნე გამსახურდიას ჯგუფურად განზრახ მკვლელობის მცდელობის საქმეზე ბრალდებულის, ტატო ღარიბაშვილის ადვოკატმა მუხლის გადაკვალიფიცირება მოითხოვა. ადვოკატის, დიმიტრი მჭედლიშვილის თქმით, ჯგუფურად მკვლელობის მცდელობასთან დაკავშირებით მტკიცებულებები საკმარისი არ არის. რასაც არ ეთანხმება გამსახურდიას ადვოკატი.

"საქმეში არსებობს ყველა საჭირო მტკიცებულება, რომელიც პირდაპირ გონივრულ ეჭვს მიღმა სტანდარტით ადასტურებს ბრალდებულების დანაშაულს. მუხლი, რომელიც მათ აქვთ წარდგენილი 13-დან 17 წლამდე პატიმრობას ითვალისწინებს და იმის გათვალისწინებით, რომ მათ დანაშული ჩაიდინეს ღიად, საჯაროდ, არ მოუნანიებიათ ჩადენილი ქმედება, არ ითანამშრომლებს გამოძიებასთან, არ არსებობს არცერთი შემამსუბუქებელი გარემოება მათ მიმართ, ამიტომ ჩვენი კატეგორიული მოთხოვნაა, გამოყენებულ იქნეს სასჯელის უმკაცრესი ზომა — 17 წელი", — განაცხადა ჟურნალისტებთან თბილისის საქალაქო სასამართლოს სხდომის დასრულების შემდეგ ცოტნე გამსახურდიას ადვოკატმა, ამირან გიგუაშვილმა.

საქმის პროკურორის, მარიკა გოგოხიას თქმით, ბრალდების მხარემ ყველა მტკიცებულება წარმოადგინა, რითიც დაკავებულების დანაშაული დასტურდება.

ცოტნე გამსახურდია 19 დეკემბერს დაჭრეს. შემთხვევა თბილისში, ვერაზე მოხდა. მომხდარზე გამოძიება სისხლის სამართლის კოდექსის 19-108 მუხლით დაიწყო, რაც განზრახ მკვლელობის მცდელობას გულისხმობს. დამამძიმებელ გარემოებაში ჯგუფურად ჩადენილი განზრახ მკვლელობის მცდელობის ბრალდებით ორი პირი დააკავეს, ხოლო დანაშაულის შეუტყობინებლობის ბრალდებით — სამი.