აშშ-ს პრეზიდენტო დონალდ ტრამპი ირანს მოუწოდებს გაუუქმოს სასიკვდილო განაჩენი მოჭიდავეს, რომელიც ორი წლის წინ საპროტესტო აქციებში მონაწილეობდა. 2018 წლის აქციებზე მოსახლეობა ეკონომიკურ მდგომარეობასა და პოლიტიკურ რეპრესიებს აპროტესტებდა.

27 წლის ნავიდ აფქარს შარიზში საპროტესტო აქციის დროს დაცვის თანამშრომლის მოკვლის ბრალდებით ორი სასიკვდილო განაჩენი მიუსაჯეს. თუმცა როგორც BBC წერს, არსებობს ეჭვი, რომ მან აღიარებითი ჩვენება წამების ქვეშ მისცა.

ამასთან, ნავიდ აფქარის ორ ძმას ამავე საქმეზე 54 და 27 წლით თავისუფლების აღკვეთა მიუსაჯეს.

დონალდ ტრამპის განცხადებით, ერთადერთი, რაც მოჭიდავემ გააკეთა, აქციაში მონაწილეობაა. მისი სასიკვდილო განაჩენის გამო შეშფოთება გამოთქვა სახელმწიფო დეპარტამენტის პრესსპიკერმა, მორგან ორტეგუსმა. აფქარის გათავისუფლების მოთხოვნას ჭიდაობის ათეულობით საერთაშორისო ორგანიზაციაც შეუერთდა.

მოჭიდავის სასიკვდილო განაჩენის შესახებ 3 სექტემბერს გახდა ცნობილი. აუდიოჩანაწერში, რომელმაც ციხიდან გაჟონა, ნავიდ აფქარი ამბობს, რომ მას აწამებდნენ. ასევე, მოჭიდავის დედა ყვება, რომ ძმებს აიძულებდნენ ერთმანეთის წინააღმდეგ მიეცათ ხმა.