დაავადებათა კონტროლის ცენტრის დირექტორის, ამირან გამყრელიძის განცხადებით, საკოორდინაციო საბჭოს სხდომაზე "მწვავედ განიხილეს", რომ თავად დაიცვან მათ მიერ გაცემული რეკომენდაციები. ასე უპასუხა მან ფორმულას წამყვანის, გიორგი თარგამაძის რეპლიკას სამთავრობო გუნდის ორგანიზებულ მრავალრიცხოვან შეკრებაზე, სადაც სოციალური დისტანციაც არ არის დაცული.

"საკოორდინაციო საბჭო იყო დილას და ძალიან მწვავედ იქნა ეს საკითხი განხილული, რასაც თქვენ ხაზი გაუსვით, რომ ჩვენ თვითონ [ვიყოთ] მაგალითი ყველასთვის. რომ ყველგან დაცული [იყოს] ორი მთავარი რეკომენდაცია: პირბადის ხმარება ყველა დახურულ დაწესებულებაში. ასევე, ღია სივრცეებში, სადაც იკრიბება 50-100 ადამიანი და დისტანცია არ იცვება. იქ აუცილებელია პირბადის ტარება", — განაცხადა გამყრელიძემ.

მისი თქმით, ქვეყანაში შეიქმნა ილუზია, რომ კორონავირუსი დაამარცხეს, რაც სიმართლე არ არის. მანვე აღნიშნა, რომ ინფიცირების დაბალი მაჩვენებელი დამშვიდების საფუძველი არ არის.

საკოორდინაციო საბჭოში შედიან მთავრობის წევრები და NCDC-ის ხელმძღვანელები. საკოორდინაციო საბჭო შეიქმნა მას შემდეგ, რაც კორონავირუსის პანდემია დაიწყო. საბჭო აწესებს შეზღუდვებსა და წესებს, რომლებიც ვირუსის პრევენციისთვის საჭიროა.

მმართველი გუნდი ბოლო პერიოდში აქტიურად მართავს შეხვედრებს, სადაც მაჟორიტარობის დეპუტატებს წარადგენს. პრემიერმინისტრისა და ქართული ოცნების ოფიციალურ ფეისბუქგვერდებზე გავრცელებულ კადრებში ჩანს, რომ არც დახურულ და არც ღია სივრცეში სამთავრობო გუნდის წევრებს არ უკეთიათ პირბადე და არ არის დაცული დისტანცია.

ფოტო: გახარია / FB

ფოტო: გახარია / FB

ფოტო: ქართული ოცნება / FB

ფოტო: გახარია / FB

თუმცა, დღეს, საკოორდინაციო საბჭოს სხდომის შემდეგ გავრცელებულ ფოტოებში ჩანს, რომ მმართველი გუნდის წევრებს და მათ მხარდამჭერებს ღია სივრცეშიც პირბადეები უკეთიათ.

ფოტო: გახარია / FB

ფოტო: გახარია / FB