ტაივანში სამი წლის გოგო ფრანის ზონარში გაეხვა და ქარმა ის შეშინებული თვითმხილველების თვალწინ ჰაერში აიტაცა. ბავშვი უვნებლად გადარჩა.

გოგონა კვირას, 30 აგვისტოს, სინჩუს მახლობლად ზღვისპირა ქალაქ ნანლიაოს ფრანების ფესტივალში მონაწილეობდა, როდესაც ის გიგანტურ, გრძელკუდიან ნარინჯისფერ ფრანში გაიხლართა და მიწიდან რამდენიმე მეტრის სიმაღლეზე აიტყორცნა.

ტაივანური მედიის გამოქვეყნებულ ვიდეოში ჩანს, როგორ უჭირს ძლიერი ქარის პირობებში ფესტივალის რამდენიმე თანამშრომელს ფრანის გაშვებამდე მისი გრძელი კუდის დაჭერა.

გარშემო ათობით თვითმხილველი და ოჯახი იყო შეკრებილი და ფრანის გაშვებას შეძახილებით ეგებებოდა. მიუხედავად ამისა, ბედნიერი შეძახილები მალევე შეშინებულ ყვირილად გადაიქცა, როდესაც მათ გაიაზრეს, რომ ფრანის კუდში პატარა ბავშვი იყო გახლართული. ქარმა ის ჰაერში აიტაცა და 30 წამზე მეტი ხნის განმავლობაში იქით-აქეთ სწრაფად აქანავებდა, სანამ ოპერატორებმა ფრანის ჩამოშვება მოახერხეს და ბავშვი შეჯგუფებული ბრბოს ხელებში შედარებით ნელა არ ჩამოვიდა.

ოფიციალური ცნობით, გოგონა შეშინებული იყო, თუმცა მას ფიზიკური დაზიანებები არ მიუღია.

შენიშვნა: ბავშვი უვნებლად გადარჩა, მაგრამ, შესაძლოა, ვიდეო თქვენთვის უსიამოვნო სანახავი იყოს.

ადგილობრივი მმართველობის წარმომადგენელმა ზან ლი კემ თქვა, რომ ძლიერმა ქარებმა ფრანის კუდი ბავშვის ტანს შემოახვია.

აზიური ფრანების ფორუმის ტაივანელმა მდივანმა ჩენ კო-ფანგმა თქვა, რომ ფრანს ჰაერიდან კანფეტები უნდა გადამოეყარა ბავშვებისთვის. მისი თქმით, ბავშვებს, როგორც წესი, ფრანის გაშვებამდე შორ დისტანციას აკავებინებდნენ, მაგრამ ორგანიზატორები ქარის ასეთ ძლიერ და უეცარ დაქროლვას არ ელოდნენ — ეს ბოფორტის სკალაზე მე-7 დონის, ანუ დაახლოებით საათში 50-60 კმ-ის სიჩქარის, ქარები იყო.

ინციდენტის შემდეგ სინჩუს მერმა ლინ ჩი-ჩიენმა ოფიციალური განცხადება გააკეთა და საჯარო ბოდიში მოიხადა.

ლინის თქმით, ფესტივალზე ყველა აქტივობა მყისიერად შეწყდა, რათა ძლიერ ქარებში ხალხის უსაფრთხოება შენარჩნებულიყო, მუნიციპალიტეტის ოფიციალურმა პირებმა კი ბავშვი და მისი ოჯახი საავადმყოფომდე მიიყვანეს, სადაც პატარა გოგონას კისერზე რამდენიმე ნაკაწრის გარდა დაზიანებები არ აღმოაჩნდა.

"ქალაქის მმართველი გუნდი დაზარალებულსა და საზოგადოებას გულწრფელ ბოდიშს უხდის. ჩვენ განვიხილავთ ინციდენტს, რათა ასეთი უბედურება მეორედ აღარ განმეორდეს. აგრეთვე ყურადღებით გამოვიძიებთ, ვინ არის ამაზე პასუხისმგებელი", — თქვა ლინმა.