ლევან რატიანის თქმით, შატილში ავარიის დროს დაშავებული 3 ადამიანის მდგომარეობა მძიმეა, თუმცა შეინიშნება დადებითი დინამიკა.

"თქვენ იცით, რომ 2 ქალბატონთან ჩატარდა ინტერვენციული ღონისძიება, ლიკვიდირებულია ტრამვის შედეგად მიღებული დაზიანებები. მათი მდგომარეობა ამ ეტაპზე კვლავ რჩება მძიმე, თუმცა დადებითი დინამიკით. განმეორებით ჩატარებულ კლინიკური-ლაბორატორიული კვლევების შედეგად უარყოფითი დინამიკა არ ვლინდება, თუმცა მინდა გითხრათ, რომ მათ აქვთ ძალიან რთული გზა გასავლელი გამოჯანმრთელებამდე", — ამბობს რატიანი.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას ითვალისწინებს.