ლელოს ლიდერები პატრიოტთა ალიანსის ანტიკონსტიტუციურად გამოცხადებას მოითხოვენ. ლელოს მაჟორიტარი დეპუტატობის კანდიდატები, ანა ნაცვლიშვილი, თორნიკე ართქმელაძე და ანა ბიბილაშვილი ქართულ ოცნებასა და საქართველოს პრეზიდენტს მოუწოდებენ, იმოქმედონ სახელმწიფო ინტერესების დასაცავად და დაიწყონ შესაბამისი სამართლებრივი პროცედურა.

"წინააღმდეგ შემთხვევაში ქართული ოცნება ურყევად დაადასტურებს, რომ მმართველი პარტიაც იზიარებს პატრიოტთა ალიანსის ბანერზე გამოხატულ პოლიტიკურ შეხედულებებს, ღიად და დაუფარავად ატარებს პრორუსულ კურსს საქართველოში. აღნიშნული კიდევ ერთხელ დაადასტურებს იმ ფაქტს, რომ არც რუსეთის დუმის დეპუტატის ჩაბრძანება მომხდარა ექსპრომტად საქართველოს პარლამენტის სპიკერის სავარძელში, რასაც მოჰყვა 20-21 ივნისის მძიმე მსხვერპლი და ტრაგიკული მოვლენები", — განაცხადა ანა ნაცვლიშვილმა.

ღია პრორუსულმა პარტიამ, პატრიოტთა ალიანსმა გააკრა საარჩევნო ბანერები, რომლებზეც აჭარის რეგიონი გამოყოფილია, როგორც ოკუპირებული ტერიტორია, აფხაზეთთან და სამხრეთ ოსეთთან ერთად. აღნიშნულს სოციალურ ქსელში კრიტიკა მოჰყვა, პატრიოტთა ალიანსს შუღლის გაღვივებაში ადანაშაულებენ. პარტიაში კი ამაში პრობლემას ვერ ხედავენ. მეტიც, პარტიის ლიდერს, ირმა ინაშვილს ჰგონია, რომ ეს "აჭარისა და ქვეყნის ერთიანობის დაცვისკენ" მიმართული ქმედებაა.

აღნიშნული ბანერებიდან ერთ-ერთი ლელოს წევრმა ირაკლი კუპრაძემ ჩამოხსნა, დანარჩენები კი ბათუმის მუნიციპალურმა ინსპექციამ.

მოგვიანებით ალიანსის ლიდერმა, ირმა ინაშვილმა დაიწყო იმის მტკიცება, რომ მათი ბანერი "არასწორად შეფერადებულ მდგომარეობაში" გიგა ბოკერიას და მიხეილ სააკაშვილის დავალებით, მის პარტიაში მყოფმა, მოსყიდულმა პირებმა გააკრეს. ინაშვილი ამტკიცებს, რომ მათ ბანერზე აჭარა არა ოკუპირებული რეგიონების ფერებში, არამედ ყვითლად იყო გამოყოფილი და SOS ეწერა.

ამავე დღეებში პატრიოტთა ალიანსი ანტიეროვნულ ქმედებებში დაადანაშაულეს, როცა ისინი ოკუპირებულ რეგიონში ჩავიდნენ დე ფაქტო პრეზიდენტის ყოფილი თანაშემწის დახმარებით. გარდა ამისა, რუსულმა საგამოძიებო პორტალმა გაავრცელა ინფორმაცია იმის შესახებ, რომ პარტია წინასაარჩევნოდ კრემლიდან ფინანსდება.