სახალხო დამცველის, ნინო ლომჯარიას, თქმით გარდაცლილი თამარ ბაჩლიაშვილის ოჯახის წევრებს შეხვდება. აღნიშნავს, რომ ამ შეხვედრის შემდეგ გამოიკვეთება, თუ კონკრეტულად რა მიმართულებით სჭირდება ოჯახს სახალხო დამცველის მხარდაჭერა.

"უახლოეს დღეებში მე ვხვდები გარდაცვლილი გოგონას მშობლებს. მე ვხედავ, რომ ოჯახი გარკვეულ უკმაყოფილებას გამოძიების მისამართით გამოთქვამს. მნიშვნელოვანი იქნება შეხვედრა. იმედია, იქნება ადვოკატიც, რომ სამართლებრივ საკითხებზეც ვისაუბროთ", — განაცხადა ლომჯარიამ.

რუსთავის სამხარეო პოლიციაში, გარდაცვლილი 23 წლის პროგრამისტის, თამარ ბაჩალიაშვილის ავტომობილის ექსპერტიზა მიმდინარეობს. როგორც ექსპერტიზის დაწყებამდე ოჯახის ადვოკატმა, მიხეილ რამიშვილმა განაცხადა, დღევანდელი ექსპერტიზით დეტალურად იქნება გამოკვლეული ავტომობილის მდგომარეობა გადაადგილების პროცესში.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.