ზაფხულის დასასრული ტელევიზიებისთვის ყველაზე საინტერესო პერიოდია. სწორედ ამ დროს ვიგებთ, რა ცვლილებებს უნდა ველოდოთ ჩვენთვის კარგად ნაცნობი პროექტებისგან. 31 აგვისტოდან მთავარი არხის დილის გადაცემაც ბრუნდება და, როგორც ახალი პრომოდან ჩანს, წინ საინტერესო ამბები გველის.

შენი დილის ახალი სეზონის შესახებ გადაცემის პროდიუსერს, თაშკა ჩანტლაძეს ვესაუბრეთ და 3 მთავარი სიახლეც გამოვტყუეთ:

1. შენი დილა უკვე ორშაბათიდან კვირის ჩათვლით გავა ეთერში

ასე რომ, არც ის ადამიანები დაიჩაგრებიან, რომლებიც შაბათსაც მუშაობენ, ან უბრალოდ, უქმეებზეც ადრე იღვიძებენ.

2. კვირის დღეებში ერთმანეთს წამყვანების სამეულები შეენაცვლებიან

ძველი და ახალი გვარდია

ფოტო: შენი დილა

"წინა სეზონისგან განსხვავებით, ახლა უკვე სამეულები გვყავს. ორშაბათს, ოთხშაბათსა და პარასკევს ისევ "ძველ გვარდიას" ვნახავთ ეთერში, ანუ თაკო მესხს, თათია თოფურიასა და კოკო როინიშვილს. სამშაბათს და ხუთშაბათს კი — ლაშა ნაკაიძეს, ბაჩი ვალიშვილსა და სოფო ბათილაშვილს", — აცხადებს "შენი დილის" გუნდი.

3. შაბათ-კვირის ეთერი კი ვარსკვლავებით იქნება დახუნძლული

შაბათ-კვირას დილის წამყვანები ეკა დემეტრაძე, სანდრო კაკულია და ილო ბეროშვილი იქნებიან, მუსიკალურ რუბრიკას კი მარინა ბერიძე გაუძღვება.

"მთავარი პრინციპი, რომელიც შენს დილას სხვა გადაცემებისგან გამოარჩევს არის ის, რომ წამყვანები დაწერილ ტექსტს არ კითხულობენ. აქ ვერ ნახავთ კადრ-სინქრონებს წინა დღის ამბებით. შენს დილას ასეთად აქცევენ მრავალფეროვანი წამყვანები, რომელთაც სხვადასხვა საკითხებზე საკუთარი პოზიცია აქვთ და სანახაობის შექმნა შეუძლიათ. მათი მიზანი არაა, რომ მაყურებელი უბრალოდ კარგ ხასიათზე დააყენონ, ხანდახან გვირჩევნია, მაყურებელი დავაინტერესოთ ან დავაფიქროთ", – აცხადებს გადაცემის პროდიუსერი.

გადაცემა პირველად ეთერში 9 დეკემბერს გავიდა და განსხვავებული ფორმატის დამსახურებით, მალევე მოიპოვა პოპულარობა.

განახლებულ გადაცემას შეგიძლიათ თვალი ადევნოთ ორშაბათიდან პარასკევამდე 07:55-10:00 საათებში, შაბათ-კვირას კი — 09:00-11:00.