ვიკიმედიის მომხმარებელთა საქართველოს ჯგუფისა და აზიური ვიკიმედიელთა გაერთიანების კონკურსის "ვიკიპედიის აზიის თვე 2019-ის" გამარჯვებულებს ჯილდოები გადაეცათ.

"ვიკიპედიის აზიის თვე" არის ყოველწლიური ვიკიმარათონი, რომელიც იმართება ყოველი წლის ნოემბერში. მარათონის მიზანი ქართულ ვიკიპედიაში აზიის ქვეყნების შესახებ სტატიების რაოდენობისა და ხარისხის ზრდაა. მარათონში მონაწილეობის მიღება ვიკიპედიის ნებისმიერი განყოფილების ნებისმიერ რეგისტირებულ მომხმარებელს შეუძლია.

2019 წლის კონკურსის სამ გამარჯვებულს გადაეცა ბიბლუსის სასაჩუქრე ბარათები: I ადგილი — 500 ლარი, II ადგილი — 400 ლარი და III ადგილი — 300 ლარი. კონკურსის გამარჯვებულები გახდნენ რევაზ აფრიაშვილი, ლუკა ბარბაქაძე და იაკობ მახარაძე.

შეგახსენებთ, რომ ვიკიმედიის მომხმარებელთა საქართველოს ჯგუფი (ვმ საქართველო), არის ოფიციალურად რეგისტრირებული არასამეწარმეო (არაკომერციული) იურიდიული პირი, რომელიც წარმოადგენს ფონდ ვიკიმედიის მომხმარებელთა ჯგუფს. ფონდი ვიკიმედია აშშ-ში დაფუძნებული არაკომერციული ორგანიზაციაა, რომელიც მუშაობს და მართავს ვიკიმედიის პროექტებს.

ვიკიმედიის მომხმარებელთა საქართველოს ჯგუფი შეიქმნა 2015 წელს, საქართველოში მცხოვრები ვიკიმედიის პროექტების აქტიური წევრების მიერ, რომლებიც ეროვნულ დონეზე გამართული ღონისძიებების ორგანიზებითა და მონაწილეობით არიან დაინტერესებულნი. წევრების მიზანია, ხელი შეუწყონ და მონაწილეობა მიიღონ ფონდ ვიკიმედიის მიერ შემოთავაზებულ პროექტებში და ქართული ვიკისაზოგადოების მიერ ორგანიზებულ პროექტებში. ორგანიზაციის ერთ-ერთი ძირითადი მისიაა ხალხის დახმარება და წახალისება, საზოგადოებრივ დომენში ცოდნის და სხვა საგანმანათლებლო, კულტურული და ისტორიული შინაარსის მასალის შეგროვება, განვითარება და გავრცელება, ან სხვა ლიცენზიების საშუალებით, რაც საშუალებას აძლევს ყველას, თავისუფლად გამოიყენოს ცოდნა, განათავსოს და შეცვალოს მისი შინაარსი უფასოდ.