ავსტრალიელი ქალი, რომელიც უნიტაზის ჩარეცხვას ვერ ახერხებდა, გაოგნებული დარჩა, როდესაც ჩასარეცხ ავზში ერთმანეთს შემოხვეული ოთხი გველი იპოვა.

25 წლის სოფი პირსონმა თქვა, რომ უნიტაზის ჩასარეცხად ღილაკზე ძალიან ძლიერად დაჭერა მოუწია.

"ცოტა დავიბენი და ვიფიქრე, რომ თავსახური უნდა ამეხადა და მენახა, რაში იყო საქმე", — თქვა მან.

7News-ის ცნობით, მან ოთხი დაკლაკნილი ჩვეულებრივი ხის გველი იპოვა. მათგან ყველაზე დიდი 1 მეტრის სიგრძის იყო.

"რამდენიმე წამი ვუყურებდი და ვფიქრობდი... მოიცა, ეს ასე არ უნდა იყოს", — უთხრა სოფიმ 7News-ს.

ქვინსლენდის გარემოს დეპარტამენტის თქმით, ჩვეულებრივი ხის გველები, რომლებიც დიდწილად ბაყაყებითა და ხვლიკებით იკვებებიან, შხამიანები არ არიან და მათ, როგორც წესი, ხის ფუღუროებში, ნაპრალებსა და ფოთლეულობაში სძინავთ.

პირსონმა ქვეწარმავლებს მობილურით ფოტო და ვიდეო გადაუღო, სანამ მათ მოშორებაში მოსახმარებლად მეგობარს დაურეკავდა. მეგობარმა გველები ავზიდან ამოიყვანა და ახლომდებარე ლერწმის ყანაში უვნებლად გაუშვა.

ეს პირველი შემთხვევა არ არის, როდესაც პირსონმა ასეთი აღმოჩენა გააკეთა. დაახლოებით ერთი თვის წინ მან კიდევ ერთი გველი იპოვა აბაზანაში, ტუალეტის მახლობლად.

ქალის თქმით, ის ეჭვობს, რომ გველები მის სახლში იატაკში არსებული ნაპრალებიდან შემოძვრნენ.