პარტია სამართლიანობისთვის ლიდერი, ეკა ბესელია ახალ საარჩევნო ცვლილებებზე აღნიშნავს, რომ ქართული ოცნების მხრიდან "აცდენაა" და ისინი "დროსა და სივრცეში არიან არეულები". მისივე განცხადებით, ეს უკვე იყო ოპოზიციის მოთხოვნა.

ასევე, ბესელია მოითხოვს, რომ ახალ ინიციატივასთან ერთად, ხმების დაცვის მექანიზმთან დაკავშირებით წარდგენილი მისი პროექტიც განიხილონ.

"თუ ამ ინიციატივას, ახლა სექტემბერში პარლამენტი კენჭს უყრის, მაშინ ჩემი შემხვედრი წინადადებაა და ძალიან პრინციპული მოთხოვნაა, ამას მხარს უჭერს ყველა ოპოზიციური პარტია, რომ ის პროექტი, რომელიც წარვადგინე ხმების დაცვის მექანიზმი, რომ არ გაყალბდეს ამომრჩევლის ხმა ეს ინიციატივა განიხილონ ამ პაკეტთან ერთად", — აცხადებს ბესელია.

ქართული ოცნება გამოდის ინიციატივით, საარჩევნო კოდექსში შევიდეს ცვლილება, რომლის თანახმადაც, მკაცრი სანქციები განისაზღვრება იძულების, დაშინებისა და ხმის მიცემის ფარულობის დარღვევის შემთხვევებზე. მმართველი გუნდის ლიდერისა და პარლამენტის თავმჯდომარის, არჩილ თალაკვაძის განცხადებით, საკანონმდებლო ცვლილებებს პარლამენტში დღეს დაარეგისტრირებენ და სექტემბერში რეგლამენტით გათვალისწინებულ სესიებზე განიხილავენ.