საქართველოში, აზერბაიჯანსა და ბრაზილიაში აშშ–ს არჩეული პრეზიდენტის, დონალდ ტრამპის კომპანია საინვესტიციო პროექტებს წყვეტს. ამის შესახებ ინფორმაციას ტრამპის კომპანიის იურისტზე, ალან გარტენზე დაყრდნობით სააგენტო AP ავრცელებს.

როგორც იურისტმა განაცხადა, საინვესტიციო პროექტების შეჩერების მიზეზი არ არის შესაძლო ინტერესთა კონფლიქტი, რაც შეიძლება მოჰყვეს ტრამპის ოფიციალურად გაპრეზიდენტებას. როგორც გარტენი ამბობს, საინვესტიციო პროექტების შეჩერების მიზეზი გახდა პარტნიორი კომპანიების მიერ ნაკისრი ვალდებულებების შესრულება ამ ქვეყნებში.

დონალდ ტრამპი საქართველოს 2012 წლის აპრილში ესტუმრა. პროექტის მიხედვით, ბათუმში უნდა აშენებულიყო მრავალსართულიანი ტრამპ თაუერი. ტრამპს მაშინ პირადად უმასპინძლა პრეზიდენტმა მიხეილ სააკაშვილმა. პროექტი სილქ როუდს უნდა განეხორციელებინა და ის 2014 წლამდე უნდა დასრულებულიყო. მიუხედავად ამისა, პროექტი ამ დრომდე შეჩერებული იყო. მას შემდეგ, რაც დონალდ ტრამპი აშშ–ს საპრეზიდენტო არჩევნებში გამარჯვებულად დასახელდა, სილქ როუდ ჯგუფმა განაცხადა, რომ ბათუმში განაახლებდა ტრამპ თაუერის მშენებლობას.

საქართველოს მესამე პრეზიდენტი, მიხეილ სააკაშვილი ფეისბუკზე გამოეხმაურა პროექტის შეჩერებას და მასში ბიძინა ივანიშვილი და მოქმედი ხელისუფლება დაადანაშაულა.