ბელარუსში უზენაესმა სასამართლომ არჩევნების საქმის გახსნის შესახებ სამივე საპრეზიდენტო კანდიდატის საჩივარი უარყო. აღნიშნული საჩივრის ავტორები ანა კანოპატსკაია, ანდრეი დმიტრიევი და სვეტლანა ტიხანოვსკაია იყვნენ.

სასამართლოს განჩინებებიდან გამომდინარე, არჩევნების შედეგების შესახებ ცესკოს გადაწყვეტილების გასაჩივრება შეუძლებელია, თუ არჩევნები ცენტრალურმა კომისიამ ბათილად არ გამოაცხადა.

სვეტლანა ტიხანოვსკაიას საჩივარი ცენტრალური საარჩევნო კომისიის გადაწყვეტილების გაუქმებას და 9 აგვისტოს ბელარუსში ჩატარებული საპრეზიდენტო არჩევნების ბათილად ცნობას ითხოვდა.

უზენაესი სასამართლოს განცხადებით, არჩევნების ბათილად ცნობის შესახებ გადაწყვეტილებას ცენტრალური კომისია იღებს. ტიხანოვსკაიამ გამოიყენა საარჩევნო კოდექსით განსაზღვრული უფლება და ცენტრალურ კომისიასაც მიმართა საპრეზიდენტო არჩევნების ბათილობის შესახებ საჩივრით, თუმცა იმავე ცენტრალური კომისიის 2020 წლის 14 აგვისტოს გადაწყვეტილებით, ტიხანოვსკაიას საჩივარზე უარი ეთქვა.

რაც შეეხება ანდრეი დიმიტრიევის საჩივარს, უზენაესი სასამართლოს მოსამართლე იგორ მილტო აღნიშნავს: "დიმიტრიევმა საჩივარში მიუთითა, რომ ცესკომ 2020 წლის 14 აგვისტოს გადაწყვეტილებით უარყო მისი საჩივარი საპრეზიდენტო არჩევნების ბათილად ცნობის შესახებ".

"შევისწავლეთ რა განმცხადებლის საჩივარი, მიგვაჩნია, რომ საქმის განხილვაზე უარი უნდა ეთქვაღ", — თქვა მოსამართლე მილტომ განჩინებაში.

მოსამართლე ინესა ლაზოვიკოვამ, ასევე, არ დააკმაყოფილა ანა კანოპატსკაიას საჩივარი. მიზეზები იგივეა, რაც წინა ორი განმცხადებლის შემთხვევაში.