ქუთაისის საერთაშორისო აეროპორტის ინფორმაციით, ძლიერი ყინვის გამო, ევროპიდან ქუთაისის მიმართულებით და პირიქით ფრენების განრიგი შეიცვალა.

სალონიკის მიმართულებით ფრენა გაუქმდა, ბუდაპეშტისა და ვარშავის რეისები კი 1 დღით გადაიდო. ბუდაპეშტიდან თვითმფრინავი ჩამოფრინდება 18 დეკემბერს, 05:50 საათზე და ქუთაისიდან ბუდაპეშტის მიმართულებით გაფრინდება 06:20 საათზე. იმავე დღეს შესრულდება ვარშავას რეისი, რომელიც ჩამოფრინდება 06:10 საათზე და გაფრინდება 06:40 საათზე. ცვლილებები არ შეხებია სოფიას მიმართულებით განსახორციელებელ ფრენას, რომელიც დღეს, 14:30 საათზე შესრულდება.

ძლიერი ყინვისა და თოვის გამო, ვიზეარის თვითმფრინავი, რომელიც მემინგენი (მიუნხენი) - ქუთაისის ავიარეისს ასრულებდა, ქუთაისის ნაცვლად, თბილისის საერთაშორისო აეროპორტში დაეშვა.

ქუთაისის აეროპორტი, ფრენებთან დაკავშირებით, სხვა შეზღუდვების შესახებ ინფორმაციას არ ავრცელებს.