ენდრიუ კომაროვი, კიბერ-უსაფრთხოების კომპანია InfoArmor-ის ხელმძღვანელი ამბობს, რომ Yahoo-ს მოპარული ბაზა, რომელშიც მილიარდი მომხმარებლის მონაცემები შედიოდა, ჰაკერებმა დარქნეტში გაყიდეს.

ე.წ. დარქნეტი ნიშნავს ინტერნეტის ნაწილს, რომელიც მიუწვდომელია ჩვეულებრივი ბრაუზერებისთვის (Chrome, firefox, Internet explorer, Opera და ა.შ) და არ იძებნება საძიებო სისტემებში. დარქნეტს იყენებენ მაგალითად, ჩინეთში, სადაც დასავლურ სოციალურ ქსელებსა და ვებგვერდების დიდ ნაწილზე წვდომას სახელმწიფო ზღუდავს. დარქნეტის საშუალებით ასევე შესაძლებელია წვდომა ისეთ არალეგალურ პროდუქციაზე, როგორიცაა ბავშვთა პორნოგრაფია და ა.შ.

რამდენიმე დღის წინ გაირკვა, რომ ჰაკერებმა Yahoo-ს მილიარდზე მეტი მომხმარებლის ანგარიში გატეხეს. როგორც კომაროვი ამტკიცებს, ეს ბაზები სულ რაღაც $300 ათასად გაიყიდა. მისივე ინფორმაციით, მონაცემები სამმა მყიდველმა შეიძინა. ორმა სპამერმა და ერთმა შპიონაჟში ჩართულმა ჯგუფმა აღმოსავლეთ ევროპიდან.

Yahoo-ს ბაზები თითოეული მომხმარებლის სახელს, პაროლს, ტელეფონის ნომერს, პაროლის აღსადგენ ალტერნატიულ მეილს, უსაფრთხოების შეკითხვებსა და დაბადების თარიღებს შეიცავს. ეს კი იმას ნიშნავს, რომ თუ მომხმარებელი ყველა ვებგვერდზე ერთსა და იმავე პაროლს ან აღსადგენ შეკითხვებს იყენებს, მისი ყველა არსებული მონაცემი საფრთხის ქვეშაა.

მილიარდი მომხმარებლის მონაცემებს შორის 150 ათასამდე ამერიკელი სამხედროსა და საჯარო მოხელეს მონაცემებიცაა.

აღნიშნულ ინფორმაციას ჯერჯერობით არ ადასტურებს FBI და გამოძიებაში ჩართული სხვა სტრუქტურები.

კომაროვის ინფორმაციით, ბაზები ჯერ კიდევ იყიდება დარქნეტში, თუმცა ფასი $20 ათასამდე ჩამოვიდა, რადგან Yahoo-მ თავის მომხმარებლებს პაროლები შეაცვლევინა.