თამარ ბაჩალიაშვილის ოჯახის წევრები და ადვოკატი ექსპერიმენტისადმი უნდობლობას აცხადებენ და ამბობენ, რომ საქმე დადგმულ სპექტაკლთან აქვთ, თუმცა, მაინც დააკვირდებიან, როგორ განვითარება გამოძიება.

"გაატარეს ეს საითაც მიჰყავთ საქმე, ვითომ ექსპერიმენტს ატარებენ, ვითომ 4-5 დღე აქ იყო მანქანა. ეს ხომ ზღაპარია ყველაფერი. მანქანა აქ იდგა, 22 რიცხვში გამთენიისას, 4-5 საათი. რო დაგვირეკეს მანქანა ვნახეთო და ვერ მოასწრეს სხვა კვალების წაშლა. ეს ყველაფერი სპექტაკლია", — განაცხადა გარდაცვლილი გოგოს მამამ.

რაც შეეხება ოჯახის ადვოკატს, ის კიდევ ერთხელ და, როგორც თვითონ ამბობს, უკვე ბოლოჯერ იმეორებს, რომ აქ არანაირ თვითმკვლელობაზე არაა საუბარი, ეს არის ორგანიზებული მკვლელობა.

პროკურორის, ლაშა კოტრიკაძის თქმით, ექსპერიმენტი უკვე დასრულებულია. საგამოძიებო მოქმედების ოლქში ასახულია ექსპერიმენტის როგორც მიმდინარეობა, ისე შედეგები. მისივე თქმით, გადაღებულია მთლიანი ექსპერიმენტი, რაც დაერთვება სისხლის სამართლის საქმეს და მონაცემები გადაეცემა სამედიცინო ექსპერტიზას, რაც, საბოლოოდ, დასკვნაში იქნება ასახული.