გიორგი შაქარაშვილის საქმეზე, დღეს, 21 აგვისტოს მცხეთის რაიონულ სასამართლოში, საქმის მოწმეების დაკითხვა დაიწყო. პროცესი ამ წუთებში მიმდინარეობს.

ადვოკატების ინფორმაციით, მათთვის არ არის ცნობილი ბრალდების მხარე ვის წარადგენს მოწმეებად, თუმცა პროკურორმა, დავით ყაზარაშვილმა სხდომის დაწყებამდე ჟურნალისტებს დაუდასტურა, რომ დღეს მათ მოწმეებად აგარაკზე მყოფი პირები ეყოლებათ. მისი განცხადებით, ისინი იქნებიან აგარაკის პირველი ეპიზოდის, პირველი ჩხუბის მოწმეები და დაადასტურებენ, როგორც მერსედესის, ასევე ქამრის მგზავრების ჩხუბის მოტივს.

"მათ უნდა დაადასტურონ მოტივი. თუ რა მოტივი გააჩნდათ, როგორც მერსედესის, ასევე ქამრის მგზავრებს, და რატომ დაესხნენ ისინი თავს შემდეგ გიორგი შაქარაშვილს, გურამ ამირხანაშვილს და დანარჩენ პიროვნებებს. აგრეთვე, იკითხებიან საგამოძიებო და საპროცესო მოქმედებების ჩამტარებელი და მონაწილე პირები. რომლებიც დაადასტურებენ აღნიშნული მოქმედებების სისწორეს. როგორც მოგეხსენებათ აღნიშნული კონფლიქტი დაიწყო აგარაკზე, შესაბამისად ჩხუბი მოხდა აგარაკზე და მოტივიც უშუალოდ აქ წარმოჩინდა", — აცხადებს პროკურორი.

პროკურორმა ასევე, აღნიშნა, რომ დღეს მოწმეებად მათ ეყოლებათ ე. წ ნაძალადეველები, რადგან მოტივის კუთხით სწორედ ისინი არიან მნიშვნელოვანი.

სხდომაზე უკვე მივიდა ერთ-ერთი მოწმე, აგარაკის პირველ ეპიზოდში ფიგურანტი ნ.ხ.

20 აგვისტოს, არსებითი სხდომის დასრულების შემდეგ ადვოკატებმა განაცხადეს, რომ სასამართლო პროცესები ყოველდღიურ რეჟიმში, 21, 24 და 25 აგვისტოს ჩაინიშნა. ერთ-ერთი ბრალდებულის ზ.ხ-ს ადვოკატმა ეს შეაფასა, როგორც გადაწყვეტილება, სადაც "არცერთი არასრულწლოვნის საუკეთესო ინტერესები გათვალისწინებული არ არის".

ადვოკატის თქმით, უკვე სამი არასრულწლოვანი შიმშილობს: ზ.ხ, ლ. შ და ა.ქ. გელხაურის განცხადებითვე, ზ.ხ-სა და ლ..შ-ს კამერებიდან ტელევიზორები წაართვეს. საქმის პროკურორის, დავით ყაზარაშვილი აღნიშნულს არ ადასტურებს და ამბობს, რომ მას სჯერა ამას არავინ გააკეთებდა. ეს ინფორმაცია უარყო პენიტენციურმა სასმახურმაც.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც-ს; ლ.შ-ს; ნ.ქ-ს და გ.მ-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ-ს და ა.ქ-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.