2020 წლის 17 ივლისს, საქართველოს პარლამენტმა მესამე მოსმენით მიიღო ელექტრონული კომუნიკაციების შესახებ საქართველოს კანონში ცვლილებების შეტანის თაობაზე საქართველოს კანონი ("კანონი"). პრეზიდენტის მიერ ხელმოწერილი კანონი მაცნეში იმავე დღეს გამოქვეყნდა და დღეს უკვე კანონი მოქმედია.

საქართველოს დემოკრატიული ინიციატივის (GDI-ის) სტრატეგიული სამართალწარმოების პროგრამის ხელმძღვანელი, ედუარდ მარიკაშვილი აცხადებს, რომ კანონი, რომელიც საქართველოს პარლამენტმა დაჩქარებული წესით მიიღო, ბიზნეს და საინვესტიციო გარემოს ძალინ აზიანებს.

ედუარდ მარიკაშვილი: ჩვენ ჩართული ვიყავით "ელექტრონული კომუნიკაციების შესახებ" კანონში ცვლილებების ბოლო განხილვებში, მათ შორის პარლამენტშიც ვიყავით მოსმენებზე. პრობლემა იყო რამდენიმე – ერთი ის, რომ არ იყო ცხადად გამოვლენილი, ანუ გამიჯნული ეს ცვლილებები ეხებოდა თუ არა მაუწყებლებსაც. ამ ნაწილში შეჯერდა აზრები და ამ ცვლილებებიდან მაუწყებლები მეტწილად გამოირიცხნენ. ორიენტირი გაკეთდა კომუნიკაციების სფეროში ავტორიზებულ პირებთან მიმართებით, მათ შორის დროებითი მმართველის დანიშვნაზე და ამ ნაწილში მიღებული გადაწყვეტილებების სასამართლოში არ შეჩერების საკითხზე. ამიტომ, მედიის თავისუფლების ნაწილი მოხსნილია, თუმცა კითხვა არის შემდეგი – კომუნიკაციის სფეროში ავტორიზებულ პირებთან მიმართებით რამდენად მართებულია ეს ცვლილებები, რაც განხორციელდა?

მიუხედავად იმისა, რომ ჩვენ მედიის ნაწილში ვიყავით წარმოდგენილები, ადამიანის უფლებების დაცვის საკითხი არის ჩვენი ორგანიზაციის სფერო, მათ შორის საკუთრების უფლება, მერე წარმოების თავისუფლება და ვფიქრობთ, რომ ამ ჩანაწერით კანონპროექტის ავტორებმა და შემდეგ პარლამენტმა, გარკვეულწილად რეალური განზრახვები დამალეს. მაქსიმალურად ცდილობდნენ არ გაეჟღერებინათ, რომე ერთი კომპანიის მიმართ – კავკასუს ონლაინის გამო ხდებოდა ამ ცვლილების მიღება. შემდგომმა დისკუსიებმა ცხადყვეს და ყველას განცდა იყო ის, რომ ამ ცვლილელებით სურდათ იმ პრობლემის გადაწყვეტა, რაც კავკასუს ონლაინის წილების გასხვისებას უკავსირდებოდა.

ზოგადად კანონის ერთი ქეისისთვის მიღება პრობლემურია სამართლებრივი სახელმწიფოსთვის, რაც ბიზნეს და საინვესტიციო გარემოს ძალინ აზიანებს. მეორე არის საკუთრების უფლება. ეს ისეთი ცვლილებაა, რომელიც გულისხმობს, რომ დროებითი მმართველი შევიდეს და ამ დროებით მმართველს მიენიჭოს საკუთრების განკარგვის უფლება. ეს არის საკუთრების უფლებაში ძალიან უხეში ჩარევა. მე ვფიქრობ, რომ არა მხოლოდ ჩარევაა, არამედ დარღვევაა საკუთრების უფლების. თუკი ცნობილი გახდება, რომ განკარგულ ქონებასთან მიმართებით დროებითი მმართველის გადაწყვეტილება იყო უკანონო, არ არსებობს ბერკეტი, რომლითაც მოხერხდება დაბრუნდეს ეს ქონება პირვანდელ მფლობელთან. ქონება უკვე განკარგულია, ანუ, პირვანდელ მდგომარეობაში აღდგენა საკუთრების უფლების მფლობელთან იქნება შეუძლებელი. ამიტომ, ამ კუთხით არის ეს ცვლილებები პრობლემური.

კავკასუს ონლაინი აპირებს საკონსტიტუციო სარჩელით მიმართოს სასამართლოს. თვლით თუ არა რომ კანონში განხორციელებული ცვლილება არის ანტიკონსტიტუციური?

საკუთრების უფლებასთან მიმართებით, არის ძალინ დიდი განცდა იმის, რომ ეს ნორმები, სავარაუდოდ, შესაძლოა გამოცხადდეს როგორც არაკონსტიტუციური. აქვს იმის რესურსი, რომ გამოცხადდეს როგორც არაკონსტიტუციური.