მართალია, სერიალი Supernatural დასასრულს უახლოვდება, თუმცა ჯენსენ ეკლსი სხვა ცნობილ სერიალში გააგრძელებს ერთგული ფანების გახარებას.

ჯენსენ ეკლსი Amazon-ის გახმაურებულ სერიალ The Boys-ის მესამე სეზონში გამოჩნდება და სუპერგმირ Soldier Boy-ის როლს შეასრულებს.

ამის შესახებ ინფორმაცია თავად მსახიობმა გაავრცელა: სიახლე ინსტაგრამზე გამოქვეყნებული ვიდეოთი გვაუწყა.

"ვფიქრობდი, როცა ზებუნებრივი დასრულდება, რაღა უნდა მეკეთებინა... და აი, უცებ მივხვდი", — ვკითხულობთ იმ ვიდეოს აღწერაში, რომელშიც მსახიობს The Boys-ის კომიქსი უჭირავს, ფონად კი ელვის პრესლის სიმღერა Soldier Boy ისმის.

აღსანიშნავია, რომ Supernatural-სა და The Boys-ს საერთო სცენარისტი — ერიკ კრიპკე ჰყავს.

"ჯენსენი შესანიშნავი მსახიობი და კიდევ უფრო უკეთესი პიროვნებაა, მას შოკოლადის ნამცხვრის სუნი აქვს და ჩემს ძმად მივიჩნევ. როგორც Soldier Boy, ის ამ როლს განსაკუთრებულ იუმორს, განწყობასა და ხიბლს შესძენს. ერთი სული მაქვს, როდის ვიქნები მასთან ერთად კვლავ გადასაღებ მოედანზე, რათა The Boys-ს Supernatural-ის ელემენტები შევმატოთ", — განაცხადა ერიკ კრიპკემ.

The Boys-ის პრემიერა 2019 წელს შედგა, სულ ცოტახნში კი, 4 სექტემბერს მეორე სეზონიც გამოვა. რამდენიმე კვირის წინ ასევე ცნობილი გახდა, რომ სერიალი გრძელდება და მესამე სეზონსაც ვიხილავთ.

ჯენსენ ეკლსი 2005 წლიდან თამაშობს Supernatural-ში. წელს ეს ცნობილი სერიალი მეთხუთმეტე სეზონით სრულდება, რომლის ფინალური ეპიზოდების პრემიერა 8 ოქტომბრიდან დაიწყება.