ახალგაზრდა იურისტთა ასოციაცია პრემიერის განცხადებას ეხმიანება სახელმწიფო დაწესებულებების მიერ, საბიუჯეტო სახსრების 10 პროცენტით შემცირების შესახებ და მთავრობას რეკომენდაციებით მიმართავს.

პრემიერ მინისტრის განმარტებით, საბიუჯეტო სახსრების შემცირება პირველ რიგში შეეხება საჯარო დაწესებულებების ადმინისტრაციულ ხარჯებს, თუმცა ზოგიერთ ნაწილში შტატების ოპტიმიზაცია მაინც იქნება.

საიას განცხადებით, პროცესი უნდა წარიმართოს გამჭვირვალედ და საზოგადოებისათვის დეტალური ინფორმაციის მიწოდების მეშვეობით. მთავრობამ უნდა წარმოადგინოს ერთიანი ხედვა და საზოგადოებას მიაწოდოს ინფორმაცია საბიუჯეტო სახსრების შემცირების ძირითადი მიმართულებების, სფეროებისა და კრიტერიუმების თაობაზე.

საიას მიაჩნია, რომ მთავრობამ უნდა დაასაბუთოს საბიუჯეტო სახსრების შემოთავაზებული პროცენტული ოდენობით შემცირების მიზანშეწონილობა და მისი პოზიტიური გავლენა ეკონომიკური მდგომარეობის გაუმჯობესებასა და ლარის კურსის სტაბილურობის მიმართებით.

ახალგაზრდა იურისტთა ასოციაცია ხედავს გარკვეულ რისკებს, პრემიერის ინიციატივაში და განცხადებაში წერს, რომ საჯარო დაწესებულებებისათვის საბიუჯეტო სახსრების შემცირებამ შესაძლებელია გამოიწვიოს შტატების შემცირება და საჯარო სამსახურში დასაქმებული პირების გათავისუფლება:

მათივე აზრით, საჯარო დაწესებულებებში შტატების ოპტიმიზაციის პროცესი ობიექტურობად და გამჭვირვალედ უნდა წარიმართოს:

"სასურველია, რომ საჯარო დაწესებულებამ საბიუჯეტო სახსრების შემცირება მიმართოს ადმინისტრაციული ხარჯების შემცირებისკენ და მაქსიმალურად ეცადოს მიიღოს ყველა საჭირო ზომა შტატების მასიური შემცირების თავიდან ასარიდებლად. საჯარო დაწესებულებამ, ყოველ კონკრეტულ შემთხვევაში, უნდა წარმოადგინოს დასაბუთება საბიუჯეტო სახსრების შემცირების ფარგლებში შტატების ოპტიმიზაციის საჭიროების თაობაზე".