ევროპული საქართველოს ერთ-ერთი ლიდერის, სერგი კაპანაძის განცხადებით, ის, რომ ბელარუსში საქართველოს ელჩი იქ მიმდინარე პროცესების დროს ისვენებდა, კითხვის ნიშნებს იწვევს. კაპანაძე მიიჩნევს, რომ ქვეყანაში არსებული სიტუაციიდან გამომდინარე, ის გაცილებით ადრე უნდა ჩასულიყო ადგილზე.

"ასეთი მნიშვნელოვანი დღეების დროს ბელარუსის ისტორიაში, და ამაზე მნიშვნელოვანი დღე ბოლო 25-30 წლის განმავლობაში არ ყოფილა, როგორ მოვახერხეთ, რომ საქართველოს ელჩი თურმე ისვენებდა და ადგილზე არ იმყოფებოდა. პასუხი ამ კითხვებზე აჩვენებს იმას, როგორი არათანმიმდევრული, არასწორი და საზიანო საგარეო პოლიტიკა აქვს საქართველოს ხელისუფლებას", — ამბობს სერგი კაპანაძე.

დეპუტატის თქმით, ასეთ დროს საქართველოს ელჩის ბელარუსში არყოფნა შემაშფოთებელი და გაუმართლებელია.

"თუ მართლა ელჩი იქნა ჩაყვანილი სასწრაფოდ გუშინ ღამე, იმიტომ რომ ის იმყოფებოდა შვებულებაში, ბუნებრივია, კითხვის ნიშანს იწვევს და მარტივად გეტყვით, შემაშფოთებელიც არის ის, რომ ასეთი მნიშვნელოვანი დღეების დროს ბელარუსის ისტორიაში, როდესაც ერთი კვირაა მიმდინარეობს საპროტესტო გამოსვლები და როდესაც ბელარუსი ხალხი იბრძვის თავისი არჩევნებისთვის, საქართველოს ელჩი არ იყო ბელარუსში. ეს არის უბრალოდ გაუმართლებელი", — აცხადებს კაპანაძე.

16 აგვისტოს სოციალურ ქსელში გავრცელდა ინფორმაცია, რომლის მიხედვით, მინსკის მიმართულებით თბილისიდან გაფრინდა სამთავრობო თვითმფრინავი, რომლითაც საქართველოს პრეზიდენტი, სალომე ზურაბიშვილი სარგებლობს.

პრეზიდენტის ადმინისტრაციაში On.ge-ს უთხრეს, რომ სალომე ზურაბიშვილი მინსკში არ ყოფილა. მეორე დღეს, 17 აგვისტოს განცხადება საქართველოს საგარეო საქმეთა სამინისტრომ გაავრცელა და თქვა, რომ ბელარუსში საქართველოდან ელჩი, ვალერი კვარაცხელია გაფრინდა, რომელიც საქართველოში 6 აგვისტოდან იმყოფებოდა. უწყების თქმით, ბოლო დღეებში ბელარუსში განვითარებული მოვლენების გამო საჭირო გახდა მისი მყისიერი დაბრუნება მინსკში.