გორის საკრებულოს ქართული ოცნება — კონსერვატორების წევრი ბელაურის პრეზიდენტს, ალექსანდრე ლუკაშენკოს სოლიდარობას უცხადებს. იოსებ მუმლაძემ ამ შინაარსის პოსტი საკუთარ ფეისბუქ გვერდზე გამოაქვეყნა, თუმცა მოგვიანებით წაშალა. მისი პოსტის ფოტოს, ე.წ. სქრინს ფორმულა აქვეყნებს.

ფოტო: ფორმულა

გორის საკრებულოს პრესსამსახურმა On.ge-ს დაუდასტურა, რომ იოსებ მუმლაძე საკრებულოში ქართული ოცნების სიითაა მოხვედრილი და ამჟამად ფრაქცია ქართული ოცნება — კონსერვატორების წევრია.

On.ge იოსებ მუმლაძესთან დაკავშირებაც სცადა, თუმცა უშედეგოდ.

ლუკაშენკოს, რომელსაც "ოცნების" დეპუტატმა მხარდაჭერა გამოცხადა, ევროპის უკანასკნელ დიქტატორსად მოიხსენიებენ. ის 26 წელია ქვეყნის პრეზიდენტია და ამ არჩევნების შედეგად, პრეზიდენტობას მეექვსე ვადით შეუდგა.

სწორედ არჩევნების შედეგებს მოჰყვა საპროტესტო გამოსვლები ბელარუსში. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ნაწილი პოლიციამ დააკავა. გარდაცვლილია ორი ადამიანი.

14 აგვისტოს კი, ევროკავშირის 27 წევრი ქვეყნის საგარეო საქმეთა მინისტრებმა ვიდეოკონფერენციაზე ბელარუსის საპრეზიდენტო არჩევნები განიხილეს და აღნიშნეს, რომ შედეგები გაყალბებულია, ამიტომ ევროკავშირი ბელარუსის ცენტრალური საარჩევნო კომისიის მიერ წარმოდგენილ შედეგებს არ ცნობს. მათ სანქციების დაწესებაც გადაწყვიტეს.

ბელარუსში პროტესტი გრძელდება. პროტესტანტები არჩევნების შედეგების გაუქმებას და ხელახლა მის სამართლიან გარემოში ჩატარებას ითხოვენ.