ალეკო ელისაშვილის განცხადებით, დავით სერგეენკო ერთადერთია ქართულ ოცნებაში, რომელიც პატივისცემას იმსახურებს. ამის შესახებ მან ნინო ჟიჟილაშვილთან ფორმულას ეთერში განაცხადა.

"ერთადერთი ადამიანია ქართულ ოცნებაში, რომელიც ჩემში პატივისცემას იწვევს, თუმცა, რა თქმა უნდა, აღმაშფოთებელია, რომ ის წარმოადგენს ძალიან საძაგელ პარტიას. იმ პარტიას, რომელმაც ქვეყანას დაუკარგა პერსპექტივა", — თქვა ელისაშვილმა.

ელისაშვილი აცხადებს, რომ სერგეენკოსადმი პიროვნულად დადებითი განწყობა აქვს, თუმცა ისმის უამრავი კითხვა და მწვავე კრიტიკა სამედიცინო სფეროს წარმომადგენლებისგან.

"როცა დავით სერგეენკოს შევაქებ, ჯანდაცვის სფეროს წარმომადგენლები მწერენ და მირეკავენ, აბა კითხე, რატომ დაანგრია სერგეენკომ სისხლის გადასხმის ინსტიტუტი პავლოვზე, რატომ გააპარტახა ნარკოლოგიური, ინფექციური საავადმყოფო, ხილიანზე ბავშვთა ინფექციური, კითხეთ, რატოა განადგურებული რესპუბლიკური საავადმყოფო?!", — ამბობს ელისაშვილი.

ელისაშვილმა ასევე განაცხადა, რომ მთავარ კონკურენტად საბურთალოს ოლქში ქართული ოცნების კანდიდატს, დავით სერგეენკოს მიიჩნევს.