გიორგი შაქარაშვილის ბიძა, ადვოკატი მირიან ნიკოლაძე გედევან ფოფხაძის საარჩევნო შტაბს უხელმძღვანელებს. ეს ინფორმაცია მან On.ge-ს დაუდასტურა.

ნიკოლაძის თქმით, გედევან ფოფხაძესთან მეგობრობს და გადაწყვიტა მას დახმარებოდა.

"მოგეხსენებათ, რომ ერთი პარტიის წევრები ვართ მე და გედევანი. ის ჩემი დიდი ხნის მეგობარია, უახლოესი მეგობარი. მე არსად მაჟორიტარად არ ვაყენებ ჩემს კანდიდატურას და ამის პრობლემა არ არის. შესაბამისად, გადავწყვიტე, რომ ჩემს მეგობარს დავეხმარო. მე ამ პარტიის პოლიტიკური საბჭოს წევრი ვარ", — განაცხადა მირიან ნიკოლაძემ.

პარტია ჩვენი საქართველო-სოლიდარობის ალიანსის ერთ-ერთი დამფუძნებლის, ბექა ნაცვლიშვილის თქმით, ნიკოლაძე პარტიას გიორგი შაქარაშვილის გარდაცვალებამდე გაცილებით ადრე შეურთდა.

ნიკოლაძის განცხადებით, ის 2004 წლიდან ნაციონალურ მოძრაობის მოწინააღმდეგეთა რიგებში იყო და ქართულ ოცნებას მხარს უჭერდა. თუმცა, ახლა აცხადებს, რომ ქართული ოცნება ნაციონალურ მოძრაობასთან ერთად უნდა წავიდეს.