ზუგდიდის გამგებლის ლაშა გოგიას ბრძანება, რომელიც ძალაში 12 დეკემბერს შევიდა, გამგეობაში ახალ შინაგანაწესს ამტკიცებს.

ცვლილებები ეხება თანამშრომლების გარეგნულ იერს. ისინი ვალდებულები არიან სამუშაო დღეებში ატარებდნენ "საქმიანი ჩაცმულობის სტილს" და უფლებამოსილება განახორციელონ "ზნეობრივ-ეთიკური ნორმების" შესაბამისად.

ბრძანება, რომელსაც ხელს გამგებელი აწერს, დაუშვებლად აცხადებს სამსახურში სპორტული სტილით სიარულს, ასევე ტანზე მომდგარ შარვლებს, ღრმა დეკოლტეს, მკვეთრ მაკიაჟს, არასტანდარტულ ვარცხნილობას და ა.შ.

წინააღმდეგ შემთხვევაში თანამშრომლების მიმართ დისციპლინური პასუხისმგებლობის ზომები განხორციელდება.

შინაგანაწესი ზუგდიდის გამგეობაში

ფოტო: თაიმერი

ცვლილებების მიხედვით:

  1. თანამშრომელი ვალდებულია სამუშაო დღეებში მიმართავდეს ჩაცმულობის საქმიან სტილს, ჰქონდეს მოწესრიგებული იერსახე და ატაროს საქმიანი გარემოსთვის შესაფერისი სამოსი, სამსახურეობრივი მოვალეობა განახორციელოს მოწესრიგებული ჩაცმულობით, ზნეობრივ-ეთიკური ნორმების შესაბამისად.
  2. სამსახურში მისაღებია კლასიკური შარვლის, შავი ჯინსის, კლასიკური კაბის - ქვედაბოლოს (მინიმალური სიგრძე 3-4 სანტიმეტრი მუხლის თავიდან), პერანგისა და პიჯაკის ჩაცმა.
  3. დაუშვებელია თანამშრომელი სამსახურში გამოცხადდეს სპორტული სტილის ტანსაცმლითა და ფეხსაცმლით, ტანზე მომდგარი შარვლით, კაბით თუ ქვედაბოლოთი, ღრმად დეკოლტირებული და გამჭვირვალე პერანგით, წითელი ზონარის მქონე ტანსაცმლით.
  4. ასევე, დაუშვებელია სამსახურში მკვეთრი მაკიაჟითა და არასტანდარტული თმის ვარცხნილობით გამოცხადება.
  5. მოხელეები და თანამდებობის პირები, რომლებსაც სამუშაო სპეციფიკიდან გამომდინარე, ყოველდღიურად უწევთ მოქალაქეებთან, ოფიციალურ პირებთან და სხვა დაწესებულებებთან ურთიერთობა, ვალდებულნი არიან მკაცრად დაიცვან ჩაცმის კლასიკური სტილი.
  6. იმ მოხელის მიმართ, რომელიც ამ მუხლით განსაზღვრული ჩაცმის სტილის დარღვევით გამოცხადდება სამსახურში, გავრცელდება საჯარო სამსახურის შესახებ საქართველოს კანონით გათვალისწინებული დისციპლინური პასუხისმგებლობის ზომები.

ლაივპრესთან მიცემულ ინტერვიუში გამგებელი ლაშა გოგია აცხადებს, რომ "თანამშრომლები საჯარო სამსახურთან შეუფერებლად იცმევდნენ და ადგილი, რომ არ ჰქონოდა მსგავს ფაქტს, მაშინ ეს ბრძანებაც არ გამოვიდოდა".