გიორგი შაქარაშვილის საქმის პროკურორმა, დავით ყაზარაშვილმა პროცესის დაწყებამდე განაცხადა, რომ გურამ ამირხანაშვილის ჩვენება არ არის ერთადერთი მტკიცებულება, რამაც პროკურატურას მისცა შესაძლებლობა 5 პირისთვის განზრახ მკვლელობის ბრალდება წარედგინა.

"მხოლოდ ამირხანაშილის ჩვენება ერთადერთი მტკიცებულება არ არის სისხლის სამართლის საქმეზე. კომპლექსურად სხვადასხვა მტკიცებულებები გვაძლევს და მოგვცა იმის შესაძლებლობა, რომ მკვლელობის ნაწილში ბრალდება წაგვეყენებინა 5 პირისთვის", — განაცხადა პროკურორმა.

აქვე, პროკურორი ეხმიანება 12 აგვისტოს საქართველოს პროკურატურის მიერ გავრცელებულ განცხადებას, სადაც უწყება ადვოკატებს შაქარაშვილის საქმის მასალების და მონაცემების გამჟღავნების თაობაზე აფრთხილებს. დავით ყაზარაშვილის თქმით, ადვოკატებისა თუ ჟურნალისტების მხრიდან საქმის მასალების საჯაროდ გავრცელება გამოძიებას ხელს უშლის.

"მოწმეებმა, რომლებიც მოდიოდნენ დასაკითხად, უკვე იცოდნენ, თუ რა გარემოებების ირგვლივ იკითხებოდნენ, წინასწარ ემზადებოდნენ ამ ყველაფრისთვის და ეს გარემოებები მნიშვნელოვნად უშლიდა ხელს გამოძიებას", — აღნიშნა მან.

11 აგვისტოს საქართველოს პროკურატურამ შაქარაშვილის საქმეზე ბრალდებულ ხუთ ადამიანს ბრალი დაუმძიმა. გამოძიება ამბობს, რომ მათ შაქარაშვილს სცემეს და წყალში გადააგდეს, რის შედეგადაც ის გარდაიცვალა. ხუთი პირის გარდა, დაკავებულია 12 პირი, რომელსაც ჯგუფურ ძალადობას, ჯგუფური ძალადობის ორგანიზებას და ამავე ძალადობაში მონაწილეობას, ასევე, ჯგუფურად თავისუფლების უკანონო აღკვეთას ედავებიან. ყველა ბრალდებულს აღკვეთის ღონისძიების სახით პატიმრობა აქვს შეფარდებული.