2016 წლის საპარლამენტო არჩევნებიდან 2 თვის განმავლობაში, ცამეტმა პოლიტიკურმა პარტიამ შემოწირულობების სახით, ჯამში, 3 090 857 ლარი მიიღო.

12 დეკემბრის მონაცემებით, 8 ოქტომბრიდან - 9 დეკემბრამდე პერიოდში, სახელმწიფო აუდიტის სამსახურის ვებგვერდზე გამოქვეყნებული შემოწირულობების თითქმის 96 პროცენტი - 2 960 060 ლარი, ქართულმა ოცნებამ მიიღო. შემოწირულობების ოდენობით, მეორე ადგილზეა მრეწველობა გადაარჩენს საქართველოს, რომელსაც ქართულ ოცნებაზე 37-ჯერ ნაკლები - 79 979 ლარი შეწირეს. შემოწირულობებით მესამე ადგილზეა ერთიანი ნაციონალური მოძრაობა, რომელმაც 17 688 ლარი მიიღო. ეს თანხა ქართული ოცნების შემოსავალს 167-ჯერ, მრეწველობა გადაარჩენს საქართველოს მონაცემებს კი, 4,5-ჯერ ჩამორჩება.

დანარჩენ 10 პარტიას - მოძრაობა - სახელმწიფო ხალხისთვის , ეროვნული ფორუმი , გირჩი, საქართველოს პატრიოტთა ალიანსი, თავისუფალი საქართველო, ქართული დასი, საქართველოს რესპუბლიკური პარტია, მემარცხენე ალიანსი, საქართველოს კონსერვატიული პარტია და პროგრესულ-დემოკრატიული მოძრაობა, ჯამში, შემომწირველებისგან 33 130 ლარი ერგოთ, რაც საერთო მაჩვენებლის დაახლოებით 1 პროცენტია.

შემომწირველების რაოდენობითაც ლიდერობს ქართულმა ოცნება. მან თანხა 81 ფიზიკური და 13 იურიდიული პირისგან მიიღო. არჩევნების შემდეგ ის ერთადერთი პარტია იყო, რომელსაც იურიდიულმა პირებმა თანხა შეწირეს. იურიდიულ პირებს შორის ყველაზე მეტი თანხა - 120 000 ლარი შპს სი თი ენ ჯორჯიამ და 110 000 ლარი - შპს საინვესტიციო - დეველოპერულმა კომპანიამ, ათორიმ გადარიცხეს.

პარტიას, მრეწველობა გადაარჩენს საქართველოს, სულ 3 შემომწირველი ჰყავდა არჩევნების შემდეგ, მათგან 2 პარტიის ლიდერია. პარტიას 49 979 ლარი გოგი თოფაძემ, 20 000 ლარი კი ზურაბ ტყემალაძემ შესწირა. ნაციონალური მოძრაობის 9 შემომწირველს შორის, ყველაზე მეტი თანხა - 13 500 ლარი, პარტიის მაჟორიტარობის კანდიდატმა, დათო ჟღენტმა შესწირა.

წინასაარჩევნო პერიოდში 56-მა პოლიტიკურმა სუბიექტმა შემოწირულობის სახით ჯამში 26 008 858 ლარი მიიღეს. ამ შემთხვევაშიც შემოსავლებით ქართული ოცნება ლიდერობდა, რომელმაც შემოწირულობების თითქმის 62 პროცენტი - 16 101 506 ლარი მიიღო. მას მოსდევდა მოძრაობა სახელმწიფო ხალხისთვის (4 205 344 ლარი), საქართველოს პატრიოტთა ალიანსი (1 098 208 ლარი) და ერთიანი ნაციონალური მოძრაობა (1 018 581 ლარი). პირველ ხუთეულში მოხვდა დამოუკიდებელი დეპუტატი - ილია კოკაია, რომელმაც 559 ათასი ლარი მიიღო.