კახა კალაძის განცხადებით, არავის უთქვამს, რომ ომი საქართველომ დაიწყო, მაგრამ სააკაშვილის ხელისუფლებას პასუხისმგებლობა ეკისრება იმაზე, რომ ვერ მოახერხეს ეს აერიდებინათ ქვეყნისთვის.

"მე მგონი, ომი საქართველომ დაიწყო არავის არ უთქვამს. კიდევ ერთხელ ვიმეორებ, რა თქმა უნდა უდიდესი პასუისმგებლბა ეკისრება სააკაშვილს და მის გუნდს, მის პოლიტიკურ გუნდს, რადგან მათ ვერ მოახერხეს ეს დიდი უბედურება აერიდებინათ ქვეყნისთვის", — განაცხადა კახა კალაძემ მუხათგვერდის ძმათა სასაფლაოზე.

თბილისის მერის, კახა კალაძის, განცხადებით, ოკუპაციის წინააღმდეგ მთავარი იარაღი განათლება და ეკონომიკური განვითარებაა.

"12 წელი გავიდა იმ საშინელი დღეებიდან, რასაც მოჰყვა უდანაშაულო ადამიანების სიკვდილი, ოკუპაცია. ჩვენ არასდროს შევეგუებით ოკუპაციას. მას უნდა ვებრძოლოთ განათლებით, ეკონომიკური განვითარებით, წინსვლით. ჩვენ აუცილებლად დავიბრუნებთ დაკარგულ ტერიტორიებს", — განაცხადა კალაძემ.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.