გუშინ ჰოლივუდის უცხოური პრესის ასოციაციამ 2017 წლის ოქროს გლობუსის ნომინანტების სია გამოაქვეყნა. 67 წლის მერილ სტრიპი მუსიკალური/კომედიური ფილმის საუკეთესო მსახიობი ქალის ნომინაციაზეა წარდგენილი (ფლორენს ფოსტერ ჯენკინსი). მსახიობმა უკვე მიიღო ამ როლისთვის რამდენიმე ჯილდო და ამასწინათ Critics' Choice Awards-ის რჩეულიც გახდა.

მიუხედავად იმისა, რომ მერილმა ჯერ კიდევ 2009 წელს გადაუსწრო სხვა მსახიობებს ოქროს გლობუსის ნომინაციებისა და გამარჯვებების რაოდენობით, მისი 30-ე ნომინაცია მაინც ისტორიული ფაქტია. არც ერთ მსახიობს ამ რაოდენობის ნომინაცია არ ჰქონია.

მნიშვნელობა არ აქვს, გახდება თუ არა 8 იანვარს მერილი გამარჯვებული, მას მაინც ვიხილავთ სცენაზე, რადგან მსახიობს ცერემონიაზე სესილი დემილის სახელობის საპატიო გლობუსს გადასცემენ.

მერილ სტრიპი ნომინაციების რაოდენობით ოსკარზეც ლიდერია. კინოაკადემიის კიდევ ერთი ჯილდოს აღების შემთხვევაში, ის კეტრინ ჰეპბერნის შემდეგ მეორე მსახიობი იქნება ისტორიაში, რომელმაც 4 ოსკარი წაიღო სახლში.