ამ კვირაში დისნეიმ დააანონსა, რომ თავისი საკულტო ანიმაციის მულანი ფილმად ქცეულ ვერსიას მაყურებლების მნიშვნელოვანი ნაწილი სტრიმინგ სერვის Disney Plus-ზე იხილავდა.

ამ ფაქტმა, ცხადია, მრავალი კინომოყვარული გაახარა — დიდხნიანი ლოდინის შემდეგ ნანატრი ფილმის ხილვა შეეძლებათ, თუმცა კინოთეატრების წარმომადგენლები და მათი მხარდამჭერები გაანაწყენა.

მათ შორისაა ერთ-ერთი ფრანგული კინოთეატრის მეპატრონე, რომელიც ამ გადაწყვეტილებამ იმდენად გააბრაზა, რომ ფილმის პოსტერი ბეისბოლის ჯოხით დალეწა და ამის ამსახველი კადრები სოციალურ ქსელში გაავრცელა. ვიდეო ტვიტერზე მოულოდნელად პოპულარული გახდა: სულ რაღაც ერთ დღეში მილიონზე მეტი ნახვა დააგროვა.

პარიზის სამხრეთ ნაწილში მდებარე კინოთეატრ Cinepal-ის მეპატრონემ, ჟერარდ ლემუანმა ინტერვიუში განაცხადა, რომ ამ ქმედებით საკუთარი იმედგაცრუება და მწუხარება გამოხატა.

"კინოთეატრების უმეტესობას წარმოუდგენელი ძალისხმევა გვჭირდება, რომ კვლავ განაახლოთ მუშაობა. განსაკუთრებულ იმედებს კი იმ მაღალი მოლოდინების პროექტებზე ვამყარებთ, რომელთა პრემიერებიც უახლოეს მომავალშია დაგეგმილი. მულანის დაკარგვით კი ჩვენ დავკარგეთ შესაძლებლობა, რომ მაყურებლისთვის დიდი ხნის ნანატრი ფილმი შეგვეთავაზებინა, რაც გასული მძიმე კვირების შემდეგ ძალიან დაგვეხმარებოდა", — ამბობს ჟერარდ ლემუანი.

სხვა ბევრი კინოთეატრის მეპატრონის მსგავსად, ჟერარდ ლემუანიც ახლა ყველაზე დიდ იმედებს კრისტოფერ ნოლანის Tenet-ზე ამყარებს:

"კომპანია Warner Bros.-ის მადლობელი ვართ, რადგან ფილმის პრემიერას აგვისტოს ბოლოს გეგმავს კინოთეატრებში. თუმცა ეს არ არის საკმარისი. კინოსტუდიებმა უნდა შეიგნონ, რომ თუ ფილმების პრემიერებს გააუქმებენ ან მათ მხოლოდ ონლაინ აჩვენებენ, დიდხან ვეღარ გავაგრძელებთ. ჩემი სიცოცხლე კინოში ფილმების ჩვენებას მივუძღვენი და არ მინდა, ახლა მოვკვდე".

ნოლანის ახალი ფილმის პრემიერა აშშ-ში გაურკვეველი ვადით გადაიდო, თუმცა სხვა ქვეყნებში, სადაც კინოთეატრები ნელ-ნელა სულ უფრო აქტიურად ამუშავდა, უახლოეს კვირებში გამოვა დიდ ეკრანებზე.

რაც შეეხება მულანს, დისნეიმ გადაწყვიტა, რომ მისი ექსკლუზიური პრემიერა თავის ახალ სტრიმინგ პლატფორმაზე Disney+ შედგეს 4 სექტემბერს: მომხმარებლები $29.99-ად შეძლებენ ფილმის ნახვას. იმ ქვეყნებში კი, სადაც ეს სტრიმინგ სერვისი ჯერ არ არის ხელმისაწვდომი (მათ შორისაა საქართველო), ფილმის პრემიერა კვლავ კინოთეატრებში გაიმართება.