სამართლიანი არჩევნების ინფორმაციით, მმართველი პარტიის მხრიდან მუნიციპალიტეტებში სავარაუდო პოლიტიკური ნიშნით დისკრიმინაციის ფაქტები გამოვლინდა. ამაზე ორნანიზაციის მიერ წარდგენილ წინასაარჩევნო მონიტორინგის მეორე შუალედური ანგარიშში ვკითხულობთ.

დოკუმენტის მიხედვით, მარნეულში ევროპული საქართველოს ერთ-ერთი აქტიური წევრის ოჯახში ჩხრეკისას პოლიციის მხრიდან, სავარაუდოდ, იყო ნარკოტიკის ჩადების მცდელობა.

ანგარიშში, ასევე, ვკითხულობთ, რომ საგარეჯოში მმართველმა პარტიამ სამართლიანი არჩევნების დამკვირვებელზე სცადა ზეწოლა, კერძოდ, დამკვირვებელს მიანიშნეს, რომ "მშვიდად იყოს და ბევრი არ იაქტიუროს".

გარდა ამისა, ISFED-ის ინფორმაციით, ხელვაჩაურის სოფელ ერგეში ხანდაზმულ მოქალაქეს პანდემიის პირობებში მერის წარმომადგენელმა სოციალურ დახმარებაზე უარი უთხრა და ნაციონალურ მოძრაობასთან გადაამისამართა, რადგან ოჯახი ენმ-ს მხარდამჭერად მოიაზრება.

სამართლიანი არჩევნები მოუწოდებს ხელისუფლებასა და პოლიტიკურ პარტიებს, არ მოახდინონ ზეწოლა დამკვირვებლებზე და ხელი არ შეუშალონ სადამკვირვებლო საქმიანობაში.