ევროპული საქართველოს ლიდერი გიგა ბოკერია ფოთში, ხობისა და სენაკის მაჟორიტარულ ოლქში იყრის კენჭს. ამის შესახებ მან პარტიის მიერ მაჟორიტარი კანდიდატების წარდგენის დროს განაცხადა.

"ხშირად საუბრობენ იმაზე, რომ სიახლე სჭირდება პოლიტიკას, საქართველოს. მე ვეთანხმები, სიახლე ყოველთვის საჭიროა. ჩემთვის, რომელიც 20 წელზე მეტია პოლიტიკაში ვარ, ძნელია რამე სიახლე შევთავაზო ჩემი სახით ხალხს. პირიქით, სიახლე იქნება, რასაც ბევრი ისურვებდა, რომ მე პოლიტიკად წავიდე. მაგრამ მაინც ვიფიქრე, რომ ჯერ პოლიტიკიდან წასვლის დრო არაა და რაღაც სიახლე უნდა შემეთავაზებინა. მე გადავწყვიტე, რომ პირველად ჩემს გრძელ პოლიტიკურ ცხოვრებაში მაჟორიტარად ვიყრი კენჭს ფოთში, ხობსა და სენაკში... ფოთში, ხობსა და სენაკში არა იმიტომ, რომ დედაჩემია იქ დაბადებული, არამედ იმიტომ, რომ ეს ნაწილი მთელ საქართველოშიც კი არის ყველაზე ევროპული ნაწილი", — განაცხადა გიგა ბოკერიამ.

დღეს, 3 აგვისტოს ევროპულმა საქართველომ რეგიონებში მაჟორიტარობის 14 კანდიდატი წარადგინა. როგორც დავით ბაქრაძემ განმარტა, დღეს გუნდის მხოლოდ ნაწილს დაასახელებენ და ნაწილი ღიად რჩება.

გარდა ამისა, აჭარის უმაღლესი საბჭოში ბათუმის მაჟრიტარობის კანდიდატი არის ვახტანგ კალოიანი, ხოლო ქედის, ხელვაჩაურის, შუახევისა და ხულოს — თემურ კახიძე.

რაც შეეხება თბილისს, რაც აქამდეც ცნობილი იყო, ვაკე-საბურთალოს მაჟორიტარობის კანდიდატი იქნება ელენე ხოშტარია, ხოლო მთაწმინდასა და კრწანისში — შალვა შავგულიძე.

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ.

საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.