ბიზნესმენის და ყოფილი დეპუტატის, გოგი თოფაძის შვილიშვილის დაჭრის ბრალდებით ექსპრემიერ ზურაბ ჟვანიას შვილი დააკავეს. შსს-ს ინფორმაციით, დაჭრილია კიდევ ერთი პირი. უწყება ამბობს, რომ თოფაძის შვილიშვილი საავადმყოფოშია გადაყვანილი და ოპერაცია ჩაუტარდა.

"გამოძიებით დადგინდა, რომ ბრალდებულმა მიმდინარე წლის 2 აგვისტოს, ურთიერთშელაპარაკების ნიადაგზე, 1998 წელს დაბადებულ ლ.თ.-ს, მისსავე საკუთარ საცხოვრებელ სახლში, ცივი იარაღით სხეულზე რამდენიმე ჭრილობა მიაყენა. დაჭრილი მამაკაცი საავადმყოფოში გადაიყვანეს, სადაც ოპერაცია ჩაუტარდა.

სამართალდამცველებმა ბ.ჟ. მომხდარიდან რამდენიმე საათში, ცხელ კვალზე დააკავეს", — აღნიშნულია განცხადებაში.

გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით მიმდინარეობს, რაც ჯანმრთელობის განზრახ მძიმე დაზიანებას გულისხმობს. დანაშაული 3-დან 6 წლამდე ვადით თავისუფლების აღკვეთას ითვალისწინებს.