საზოგადოებრივი მაუწყებლის აჭარის ტელევიზიიდან გუშინ გათავისუფლებული თანამშრომლების სამსახურში დაბრუნების მოთხოვნით ხელმოწერების შეგროვება დაიწყო.

თანამშრომლები დღეს, 19:00-ზე მაუწყებელთან მათი მხარდამჭრი აქციის გამართვას გეგმავენ. ორგანიზატორები სისტემატურ აქციებს აანონსებენ მანამ, სანამ ბაჩო გურაბანიძეს, გიორგი მურვანიძესა და გურამ ქადიძეს სამსახურში არ აღადგენენ. ასევე, არხის თანამშრომლები ითხოვენ მაუწყებლის მენეჯმენტთან და მრჩეველთა საბჭოს წევრებთან შეხვედრას.

ლეილა შავიშვილი, საზოგადოებრივი მაუწყებლის აჭარის ტელევიზიისა და რადიოს ჟურნალისტი აცხადებს, რომ დღის ბოლომდე რაიმე ფორმით აუცილებლად უნდა შედგეს საუბარი მრჩეველთა საბჭოსთან და მენეჯმენტთან, რათა მოხდეს პრობლემის აღიარება და თანამშრომლების გათავისუფლების გადაწყვეტილება გადაიხედოს.

"ხელმოწერებს ვაგროვებთ თანამშრომლები. აქაც, რა თქმა უნდა, ჩვენი თხოვნა იგივეა, რომ ეს ადამიანები შეინარჩუნოს საზოგადოებრივმა მაუწყებელმა და გადაიხედოს კიდევ ერთხელ არასამართლიანი გადაწყვეტილება", — აცხადებს ლეილა შავიშვილი.

აჭარის ტელევიზიის ინფორმაციით, მენეჯმენტი აცხადებს, რომ როგორც კი ოფიციალური განცხადება შევა შეხვედრასთან დაკავშირებით, ისინი ამ საკითხზე იმსჯელებენ. მრჩეველთა საბჭოს თავჯდომარე, გიგა ჩხარტიშვილი კი ამბობს, რომ შეხვედრის და საუბრის პრობლემა არც ყოფილ და არც მოქმედ თანამშრომლებთან არ არის, თუმცა 31 ივლისს შეხვედრა ვერ მოხერხდება, რადგან მრჩეველთა საბჭოს ორი წევრი ქალაქში არ იმყოფება.

30 ივლისს აჭარის საზოგადოებრივი მაუწყებლიდან კიდევ 3 ჟურნალისტი გაათავისუფლეს, რასაც საპროტესტო აქცია მოყვა. მაუწყებლის ინფორმაციით, დირექტორის ბრძანებაში წერია, რომ ბაჩო გურაბანიძე, გიორგი მურვანიძე და გუგა ქადიძე ერთი თვის წინ მომხდარი ფიზიკური დაპირისპირების გამო გაათავისუფლეს, რომელზეც მოკვლევაც ახლა დასრულდა. თუმცა გათავისუფლები თანამშრომლები აცხადებენ, რომ მათი გათავისუფლების რეალური მიზეზი დირექტორის, გიორგი კოხრეიძის მათდამი დამოკიდებულებაა, რადგან მის საწინააღმდეგო და საპროტესტო აქციებში მონაწილეობდნენ.