დღეს, 31 ივლისს მცხეთის რაიონულ სასამართლოში გიორგი შაქარაშვილის საქმეზე 6 არასრულწლოვანის წინასასამართლო სხდომა მიმდინარეობს. როგორც ადვოკატები ჟურნალისტებთან აცხადებენ, არაერთი შუამდგომლობის დაყენებას აპირებენ, მათ შორისაა, აღკვეთი ღონისძიების გადასინჯვა და ზოგიერთი მტკიცებულების დაუშვებლად ცნობა.

არასრულწლოვანი ლ.შ.-ს ადვოკატი ზაქრო გვიშიანი აღნიშნავს, რომ მისი დაცვის ქვეშ მყოფი ბრალს არ აღიარებს. მისივე თქმით, აპირებს დააყენოს, როგორც აღკვეთის ღონისძიების შეცვლის, ასევე, მტკიცებულებების დაუშველობისა და დევნის შეწყვეტის შუამდგომლობები.

"იმის გათვალისწინებით, რომ სხდომას იხილავს ის მოსამართლე, რომელმაც კონკრეტული მტკიცებულებების გარეშე დაუსაბუთებლად შეუფარდა ყველაზე მკაცრი აღკვეთის ღონისძიება — პატიმრობა, მე არ მაქვს პოზიტიური მოლიდინი. იმის გათვალისწინებით, რომ ჩემი დაცვის ქვეშ მყოფი არაა კანონთან კონფლიქტში მყოფი, წარსულში არ არის ნასამართლევი და არ არსებობს კონკრეტული მტკიცებულებები, რომ პატიმრობა ძალაში იყოს დატოვებული, სუფთად სამართლებრივად, ამის საფუძველი არაა", — განაცხადა ზაქრო გვიშიანმა.

რაც შეეხება აღკვეთის შეცვლას, ადვოკატი აღნიშნავს, რომ ეს არასრულწლოვნის მეთვალყურეობაში გადაცემით უნდა შეიცვალოს, ალტერნატივის სახით კი შესაძლოა გირაო შესთავაზონ.

მტკიცებულებების დაუშვებლად ცნობის შუამდგომლობის დაყენებას აპირებს ზ.ხ.-ს ადვოკატი გიორგი გელხაური. მისი თქმით, ზოგიერთი მოწმის ჩვენება არსებითად შეცვლილია.

"ეს მოწმეები, რომლებიც მოგვევლინნენ ცოტა ხნის წინ აბსოლუტურად შეცვლილი ჩვენებით, რა თქმა უნდა, ეს დაუშვებელი მტკიცებულებაა, ჩვენ მოვითხოვთ ყველა იმ მოწმის დაუშვებელ მტკიცებულებად ცნობას, რომლებმაც შეცვალეს ჩვენება და არსებით წინააღმდეგობაში მოდიან საკუთარ ჩვენებებთან" — აღნიშნა გელხაურმა.

გარდა ამის, ის აღკვეთი ღონისძიების პატიმრობის გირაოთი შეცვლას მოითხოვს.

პროცესის დაწყების წინ პროკურორმა, ნიკოლოზ სანიკიძემ ჟურნალისტებთან თქვა, რომ ისინი ბრალდებულების პატიმრობაში დატოვების მომხრე არიან.