თურქეთის პარლამენტმა მიიღო კანონი, რომელიც სოციალურ პლატფორმებს, მათ შორის ფეისბუქსა და ტვიტერს ავალდებულებს მთავრობის მოთხოვნის შემთხვევაში თავიანთი პლატფორმიდან კონტენტი წაშალონ და მონაცემების თურქეთში შეინახონ.

როგორც გამოცემა CBS News წერს, ამ კანონის კრიტიკოსები ამბობენ, რომ ეს არის სოციალურ მედიაზე კონტროლისა და ოპოზიციის გაჩუმების მცდელობა.

ახალი კანონის თანახმად, სოციალური მედიის კომპანიებს, რომლებსაც დღიურად მილიონზე მეტი აქტიური მომხარებელი ჰყავთ, მოუწევთ თურქეთში წარმომადგენლობის გახსნა და კონტენტის დაბლოკვასა და წაშლაზე მთავრობის ან ინდივიდების მოთხოვნების დაკმაყოფილება. უარის შემთხვევაში, გათვალისწინებულია მათი დაჯარიმება, რეკლამების დაბლოკვა ან მათი მონაცემების გამტარობის შესაძლებლობის 90 პროცენტამდე შეზღუდვა, რის შედეგადაც მათზე წვდომა შეუძლებელი გახდება. კანონი ასევე მოითხოვს, რომ მომხმარებელთა მონაცემები თურქეთში იქნას შენახული.

კანონს მხარი დაუჭირა თურქეთის მმართველმა — სამართლისა და განვითარების პარტიამ ნაციონალისტ მოკავშირეებთან ერთად.

კანონი მას შემდეგ მიიღეს, რაც თურქეთის პრეზიდენტმა რეჯეფ ტაიფ ერდოღანმა, ტვიტერში მისი შვილისა და შვილიშვილის შეურაცხმყოფელ პოსტების პასუხად განაცხადა, რომ სოციალურ მედიაზე კონტროლი გამკაცრდებოდა.

თურქეთის პრეზიდენტის სოციალური ქსელისადმი მტრული დამოკიდებულება ახალი არ არის. 2013 წელს ერდოღანმა სოციალურ ქსელებს "საზოგადოებისთვის ყველაზე სახიფათო რამ" უწოდა მას შემდეგ, რაც მთელი ქვეყანაში ონლაინ ორგანიზებულმა პოპულარულმა პროტესტმა მოიცვა.

CBS ცნობით, ბოლო წლებში სოციალური მედიის პოპულარობა გაიზარდა მათ შორის, ვისაც მთავრობისდამი ოპოზიციური განწყობა აქვს და სურს ხელი მიუწვდებოდეს დამოუკიდებელ და მიუკერძოებელ ახალ ამბებზე. ტრადიციული მედიის უმრავლესობას ფლობენ ბიზნესები, რომლებიც მხარს უჭერენ თურქეთის მთავრობას და არ სურთ მასთან ურთიერთობის გაფუჭება.

ამასთან გამოცემა აღნიშნავს, რომ მთავრობა აქტიურად ცდილობს სოციალური მედიაზე ზეგავლენას. ტვიტერის ინფორმაციით, 2019 წლის პირვლ ნახევარში თურქეთიდან კონტენტის წაშლის 6 000 მოთხოვნა შევიდა, რაც ყველაზე მაღალი მაჩვენებელია მსოფლიოში.