"იმიტომ, რომ მას ვიღაც პოლიტმატიმარს [ეძახის], ან, რაღაც ტელევიზიის მფლობელია, ეს არ უნდა იყოს ალიბი, იმისთვის, რომ დანაშაულიდან თავი აირიდოს", — ასე შეაფასა საქართველოს პრემიერმინისტრმა, გიორგი გახარიამ მთავარი არხის მეწილის, გიორგი რურუასთვის გამამტყუნებელი განაჩენის გამოტანა.

პრემიერის მტკიცებით, მართლმსაჯულების სისტემა არის გამჭვირვალე და ბოლო წლების მანძლეზე აშკარა პროგრესს განიცდის. მისივე განცხადებით, სისტემა სამართლიანი უნდა იყოს ყველასთვის, სასჯელის აღსრულება კი ამის გარდაუვალი ნაწილია.

ჟურნალისტების კითხვაზე, შეიწყალებს თუ არა პრეზიდენტი, ოქროაშვილისა და უგულავას მსგავდად, რურუასაც, პრემიერი პასუხობს, რომ შეწყალება არის სრულად პრეზიდენტის დისკრეცია და "წარმოდგენა არა აქვს".

მთავარი არხის მეწილეს, გიორგი რურუას სასამართლომ 4 წელი მიუსაჯა. რურუას ადვოკატის, დიმიტრი საძაგლიშვილის თქმით, მიუხედავად იმისა, რომ სასამართლო სისტემის ნდობა არ აქვთ, განაჩენს სააპელაციო სასამართლოში მაინც გაასაჩივრებენ.

გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. პროკურატურის განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობისა და მისი შესრულებისათვის ხელის შეშლის შესახებ. ბრალდების მხარე აცხადებს, რომ გიორგი რურუამ უარი განაცხადა სასამართლოს განჩინების მიხედვით დნმ-სა და ხელის კვლევების ნიმუშის აღების თაობაზე. მიმდინარე წლის 15 იანვარს კი გამომძიებელმა განაცხადა, რომ რურუასგან დნმ-ის ნიმუში ნებაყოფლობით აიღეს. იგი ორივე მუხლით დამნაშავედ სცნეს.